ڪراچي:
پاڪستاني فري لانسرز ڪيترن ئي مقامي ۽ عالمي مشڪلاتن باوجود هلندڙ مالي سال جي پهرين 10 مهينن دوران 95 ملين ڊالر کان وڌيڪ جو پرڏيهي مٽا سٽا ڪمائي چڪا آهن.
ان عرصي دوران (جولاءِ 2025ع کان اپريل 2026ع تائين) پاڪستاني فري لانسرز انڊيا، چين، UAE ۽ ٻين ڪيترن ئي ملڪن جي فري لانسرز کان اڳتي وڌيا آهن.
اسٽيٽ بئنڪ آف پاڪستان موجب جولاءِ کان اپريل دوران ڪمپيوٽر ۽ انفارميشن سروسز جي شعبي ۾ فري لانسنگ ذريعي حاصل ڪيل برآمداتي آمدني 95.9 ملين ڊالر تائين پهچي وئي آهي، جڏهن ته گذريل مالي سال جي ساڳئي عرصي ۾ اها رقم 64.2 ملين ڊالر هئي.
اهڙي طرح ساليانو بنيادن تي 49 سيڪڙو يعني 317 ملين ڊالرن جو اضافو رڪارڊ ڪيو ويو.
پاڪستان فري لانسرز ايسوسي ايشن جي صدر ۽ سي اي او ڊاڪٽر عمران بٽادا چيو ته فري لانسرز جي آمدني ۾ اضافو پاڪستاني فري لانسرز جي مختلف فري لانسنگ پليٽ فارمن تي وڌندڙ شموليت جي ڪري ممڪن ٿيو، جن ۾ Upwork، Fiver ۽ سوشل ميڊيا پليٽ فارمز شامل آهن.
عمران بٽاڊا چيو ته پاڪستان ۾ فري لانسنگ جي شعور ۾ گذريل ڪجهه سالن کان تمام گهڻو اضافو ٿيو آهي، جنهن سبب ماڻهن جي وڏي انگ آن لائين سکيا، خانگي ادارن، سرڪاري تربيتي پروگرامن ۽ مختلف اين جي اوز جي شروعاتن ذريعي مهارت حاصل ڪئي آهي.
واضح رهي ته ڊاڪٽر عمران بٽادا 5 ڀيرا گلوبل سي آءِ او ايوارڊ حاصل ڪري چڪو آهي ۽ هن 25 هزار کان وڌيڪ فري لانسرز کي تربيت ڏني آهي.
هن چيو ته پاڪستان جي فري لانسنگ ڪميونٽي جو انگ 30 لک ماڻهن تي مشتمل آهي ۽ حڪومت، بينڪنگ سيڪٽر ۽ ٻين اسٽيڪ هولڊرز جي گڏيل سهڪار سان ان انگ کي منظم طريقي سان وڌائڻ گهرجي.
