اسلام آباد:
عيد الاضحيٰ جي پرمسرت موقعي تي پاڪستان جي فوجي قيادت سڄي قوم کي دلي مبارڪباد پيش ڪئي آهي ۽ ملڪ جي امن، استحڪام ۽ خوشحالي لاءِ نيڪ تمنائن جو اظهار ڪيو آهي.
آءِ ايس پي آر موجب فيلڊ مارشل عاصم منير، نيول چيف نويد اشرف ۽ ايئر چيف مارشل ظهير احمد بابر صديقي پنهنجي خاص پيغام ۾ چيو ته عيد الاضحيٰ قرباني، ايمان، ايثار، قرباني ۽ قومي اتحاد جو عظيم درس ڏئي ٿي.
عسڪري قيادت شهيدن، غازين، پاڪ فوج ۽ قانون لاڳو ڪندڙ ادارن جي قربانين کي زبردست خراج تحسين پيش ڪيو جن وطن جي دفاع لاءِ جانين جو نذرانو پيش ڪيو.
پيغام ۾ پاڪستان جي شهيدن جي خاندانن کي خاص خراج تحسين پيش ڪندي چيو ويو آهي ته قوم پنهنجي بهادر ٻارن جي قربانين کي ڪڏهن به وساري نه ٿي سگهي.
آءِ ايس پي آر موجب هٿياربند فوج ملڪ جي خودمختياري ۽ علائقائي سالميت جي دفاع جو مقدس فرض نڀائڻ لاءِ ڀرپور عزم سان بيٺي آهي، جڏهن ته پاڪ فوج امن ۽ استحڪام جي قيام لاءِ قوم سان گڏ پنهنجو ڪردار ادا ڪندي رهندي.
پيغام ۾ پاڪستان جي عوام جي استقامت، حوصلي ۽ قربانين کي به ساراهيو ويو ۽ ان عزم کي ورجايو ويو ته سمورا قومي ادارا پاڪستان جي سلامتي، ترقي ۽ خوشحالي لاءِ متحد آهن.
پاڪستان زنده باد
