ڏکڻ لبنان جي مختلف علائقن ۾ اسرائيلي فورسز جي هوائي حملن جي نتيجي ۾ 4 ٻارن ۽ 3 عورتن سميت 31 ڄڻا مارجي ويا آهن.
لبنان جي صحت واري وزارت موجب تازن حملن ۾ ٻارن ۽ عورتن سميت 31 ڄڻا مارجي ويا آهن، جڏهن ته 40 ڄڻا زخمي ٿي پيا آهن.
برج الشمالي، ڪوتيريات الراز، حبش، ماراڪا ۽ سالا سميت ڏاکڻين شهر طائر جي ويجهو مختلف علائقن مان جاني نقصان جا اطلاع مليا آهن.
اکين ڏٺن شاهدن ۽ مقامي صحافين موجب نبطيح شهر ۾ ڪيترن ئي هنڌن تي ڌماڪن کانپوءِ دونهين جا بادل اڀرندي نظر آيا، جڏهن ته هوائي حملي کانپوءِ شهرين ۾ خوف پکڙجي ويو.
لبنان جي سرڪاري نيوز ايجنسي موجب هڪ حملو سرڪاري اسپتال جي ويجهو به ٿيو، جنهن ۾ اسپتال جي ڪجهه حصن کي نقصان پهتو.
اسرائيلي فوج 50 کان وڌيڪ ڏکڻ ۽ مشرقي شهرن ۽ ڳوٺن کي انخلاء جي وارننگ جاري ڪري ڇڏي آهي، جن ۾ نباتيه شهر به شامل آهي.
فوجي ذريعن موجب اسرائيلي فوجون نام نهاد پيلي لائين کان به اڳتي آپريشن ڪري رهيون آهن، جيڪا لبنان جي سرحد کان 10 ڪلوميٽر اندر واقع آهي.
ٻئي طرف حزب الله دعويٰ ڪئي آهي ته ان جي ويڙهاڪن ڏکڻي علائقي زطار الشرقيه ۾ اسرائيلي فورسز جي اڳڀرائي کي روڪيو ۽ ڪيترن ئي حملن سان جوابي ڪارروائي ڪئي. تنظيم ڊرون ۽ راڪيٽ حملن جي ذميواري به قبول ڪئي آهي.
مشرقي لبنان ۾ بيڪا وادي واري علائقي ۾ به حملن جا اطلاع آهن، جتي صحت واري وزارت موجب مشغرا ۾ ٿيل حملي ۾ عورتن ۽ ٻارن سميت 11 ڄڻا مارجي ويا جڏهن ته ڪيترائي زخمي ٿي پيا.
امدادي ادارن جو چوڻ آهي ته ڪيترن ئي هنڌن تي ملبہ هٽائڻ جو ڪم جاري آهي، جڏهن ته صورتحال مسلسل خراب ٿي رهي آهي ۽ علائقي ۾ ڇڪتاڻ وڌيڪ وڌڻ جو خدشو آهي.
