آءِ ايم ايف انڪشاف ڪيو آهي ته حڪومتي آمدني جو گهڻو دارومدار پيٽروليم شين تي ٽيڪسن تي آهي

عالمي مالياتي فنڊ (آءِ ايم ايف) فيڊرل بورڊ آف روينيو (ايف بي آر) طرفان ٽيڪس وصولي ۾ گهٽتائي تي ڳڻتي جو اظهار ڪندي انڪشاف ڪيو آهي ته حڪومتي آمدني جو گهڻو دارومدار پيٽروليم شين تي لاڳو ٽيڪسن تي آهي جڏهن ته مختلف شعبن کي جي ڊي پي جي 1.2 سيڪڙو جي ٽيڪس ڇوٽ حاصل آهي. آءِ ايم ايف ايف بي آر جي ٽيڪس وصولي ۾ مسلسل گهٽتائي ۽ محدود ٽيڪس نيٽ کي معيشت لاءِ وڏو خطرو قرار ڏيندي ٽيڪس نيٽ کي وڌائڻ لاءِ سڌارا تيز ڪرڻ تي زور ڏنو آهي ۽ هڪ تازي رپورٽ موجب پاڪستان ۾ صوبائي سطح تي الڳ جي ايس ٽي نظام سبب پيچيدگيون وڌيون آهن. رپورٽ ۾ انڪشاف ڪيو ويو آهي ته حڪومتي آمدني جو گهڻو دارومدار پيٽروليم شين تي ٽيڪسن تي آهي، جڏهن ته مختلف شعبن کي ڏنل ٽيڪس ڇوٽ اڃا به جي ڊي پي جو 1.2 سيڪڙو آهي. زرعي شعبي جو مثال ڏيندي آءِ ايم ايف چيو آهي ته ملڪ جي جي ڊي پي ۾ 24.6 سيڪڙو حصو ڏيڻ جي باوجود زرعي شعبو رڳو 0.3 سيڪڙو ٽيڪس ادا ڪري ٿو. زرعي آمدني ٽيڪس 2025 ۾ وڌايو ويو، پر ان جي وصولي توقع کان تمام گهٽ رهي. آءِ ايم ايف صوبن کي هدايت ڪئي آهي ته اهي زرعي ٽيڪس لاڳو ڪرڻ لاءِ ايف بي آر جي ڊيٽا استعمال ڪن، ان کان علاوه ٽيڪسٽائيل، رئيل اسٽيٽ ۽ بزنس سروسز سميت گهٽ ٽيڪس وارن شعبن جي نشاندهي ڪئي وڃي. حڪومت کي ايندڙ وفاقي بجيٽ ۾ تجويز ڏني وئي آهي ته نان فائلرز لاءِ وڏي مالياتي ٽرانزيڪشن کي محدود ڪرڻ لاءِ سخت قدم کنيا وڃن، جڏهن ته نوان ٽيڪس ڏيندڙن کي به ٽيڪس نيٽ ۾ آڻڻ ۽ سيلز ٽيڪس نيٽ کي وڌائڻ لاءِ پرچون ڏيندڙن جي ٽيڪس رجسٽريشن اسڪيم کي سخت ڪرڻ جي ضرورت تي زور ڏنو ويو آهي. رپورٽ موجب آءِ ايم ايف ملڪ ۾ ڊجيٽل انوائسنگ کي مرحليوار لازمي بڻائڻ ۽ پيداوار جي نگراني جي نظام کي وڌيڪ موثر بڻائڻ جون هدايتون جاري ڪيون آهن. رپورٽ ۾ اهو به چيو ويو آهي ته ايف بي آر جي نئين آڊٽ مينوئل ۽ آڊٽ پاليسي آگسٽ 2026ع تائين لاڳو ٿيڻ جو امڪان آهي.



Source link