آمريڪي بندش ختم ٿيڻ کان پوءِ ڳالهيون ممڪن آهن؛ اقوام متحده ۾ ايراني وفد جو خطاب

گڏيل قومن ۾ ايران جي مستقل نمائندي عامر سعيد چيو آهي ته ڳالهين جو ايندڙ دور پاڪستان جي راڄڌاني اسلام آباد ۾ ممڪن آهي ته جيئن ئي ايراني بندرگاهن تي آمريڪي پابندي ختم ٿيندي. نيويارڪ ۾ گڏيل قومن جي هيڊ ڪوارٽر ۾ ميڊيا سان ڳالهائيندي ايراني نمائندي جو چوڻ هو ته جيئن ئي واشنگٽن بحري بندش ختم ڪندو، ڳالهين لاءِ رستو هموار ٿيندو ۽ ايندڙ مرحلو اسلام آباد ۾ ٿي سگهي ٿو. اهڙو بيان ايران جي سرڪاري نيوز ايجنسي جي حوالي سان سامهون آيو آهي. ٻئي طرف آمريڪي صدر ٽرمپ ايران سان جاري جنگبندي ۾ واڌ جو اعلان ڪندي چيو آهي ته اهو ان وقت تائين برقرار رهندو جيستائين تهران تڪرار جي مستقل حل لاءِ ٺوس تجويز پيش نه ڪندو. جڏهن ته هن واضح ڪيو ته ايران جي بندرگاهن تي آمريڪي ناڪابندي جاري رهندي. ماهرن موجب ٻنهي ملڪن جا بيان ظاهر ڪن ٿا ته ڳالهيون ٻيهر شروع ٿيڻ جو امڪان آهي پر ان لاءِ بنيادي شرط آمريڪي پابندين ۽ بندش جي خاتمي سان مشروط آهي.



Source link