سڪيورٽي فورسز آپريشن الزم تحت مستونگ ۾ ڪامياب ڪارروائي ڪندي 4 دهشتگردن کي ماري ڇڏيو.
ذريعن موجب سڪيورٽي فورسز آپريشن الزم تحت بلوچستان ۾ دهشتگردي خلاف انٽيليجنس جي بنياد تي ڀرپور ۽ موثر ڪارروايون ڪري رهي آهي. ان سلسلي ۾ بلوچستان جي علائقي مستونگ جي علائقي خاڊ ڪوچ ۾ ڪامياب ڪارروائي دوران فتنا الهند جي 4 دهشتگردن کي جهنم ۾ موڪليو ويو.
ڪامياب آپريشن دوران مارجي ويل دهشتگردن وٽان وڏي مقدار ۾ هٿيار ۽ بارود پڻ هٿ ڪيو ويو آهي. سڪيورٽي فورسز دهشتگردن وٽان استعمال ڪيل موٽرسائيڪل پڻ هٿ ڪري ورتي.
سڪيورٽي فورسز جي موثر ڪارروائي ۾ فتنا الهند جي ڪيترن ئي دهشتگردن جي زخمي ٿيڻ جا به تصديق ٿيل اطلاع آهن، جڏهن ته سڪيورٽي فورسز جي ڪارروائي دوران دهشتگردن جي سهولتڪاري ۾ ملوث ڪيترن ئي شڪي ماڻهن کي به گرفتار ڪيو ويو آهي.
آپريشن دوران علائقي ۾ سرچ اينڊ ڪليئرنس آپريشن جاري آهي جڏهن ته سڪيورٽي فورسز طرفان مڪمل نگراني ڪئي پئي وڃي. گذريل ڏينهن مستونگ جي علائقي خاڊ ڪوچا ۾ دهشتگردن جي ڪاررواين بعد سڪيورٽي فورسز پاران انٽيليجنس بنيادن تي ڪارروايون تيز ڪيون ويون آهن.
سڪيورٽي ذريعن جو چوڻ آهي ته سڪيورٽي فورسز جون ڪارروايون دهشتگردي جي خاتمي ۽ علائقي ۾ امن امان جي قيام تائين جاري رهنديون.
