پاڪستان جي انڊر 18 هاڪي ٽيم مصر ۾ ٿيندڙ فائيو اي سائڊ هاڪي ورلڊ ڪپ لاءِ ڪواليفائي ڪري ورتو آهي.
ان عظيم ڪاميابي سان گڏ پاڪستاني ٽيم ٽورنامينٽ جي فائنل ۾ به جاءِ ٺاهي ورتي آهي جتي 25 تاريخ تي سندس مقابلو روايتي حریف ڀارت سان ٿيندو.
قومي جونيئر ٽيم سڄي ايونٽ ۾ شاندار نظم و ضبط، جارحاڻي راند ۽ بهترين حڪمت عملي جو مظاهرو ڪيو.
سڄي ايونٽ ۾ سٺي ڪارڪردگي جو مظاهرو ڪندي فائنل تائين پهچڻ ۽ ورلڊ ڪپ جي ٽڪيٽ حاصل ڪرڻ پاڪستان هاڪي جي روشن مستقبل جو واضح ثبوت آهي.
پاڪستان هاڪي فيڊريشن جي ترجمان چيو ته پاڪستان انڊر 18 هاڪي ٽيم جي اها ڪاميابي قوم لاءِ وڏو تحفو آهي.
هن وڌيڪ چيو ته نوجوان رانديگرن جنهن محنت ۽ جذبي سان ميدان تي گرين شرٽس جي نمائندگي ڪئي آهي اها ساراهه جوڳي آهي. مصر ورلڊ ڪپ لاءِ قابليت حاصل ڪرڻ اسان جي جونيئر هاڪي ڊولپمينٽ پاليسي جي هڪ وڏي ڪاميابي آهي.
پي ايڇ ايف ترجمان قوم کي اپيل ڪئي ته 25 جولاءِ تي ڀارت خلاف فائنل ميچ لاءِ ٽيم لاءِ خصوصي دعائون گهريون.
پاڪستان هاڪي فيڊريشن جي صدر محي الدين احمد واني، ڊولپمينٽ ڪميٽي، چيف سليڪٽر ۽ ڪوچنگ اسٽاف سمورن رانديگرن ۽ قوم کي ان اهم ڪاميابي تي مبارڪباد ڏني آهي ۽ اميد ظاهر ڪئي آهي ته ٽيم فائنل کٽي ملڪ جو نالو روشن ڪندي.
