واشنگٽن/ تهران: آمريڪا ۽ ايران وچ ۾ جاري جنگ ختم ڪرڻ جي امڪاني معاهدي جي حوالي سان اهم اڳڀرائي سامهون آئي آهي.
آمريڪي صدر ڊونلڊ ٽرمپ دعويٰ ڪئي آهي ته ٻنهي ملڪن وچ ۾ اڄ امن معاهدو ٿي سگهي ٿو، پر ايران ان ٽائم لائن کي تڪراري بڻائيندي چيو آهي ته ’ايندڙ ڪجهه ڏينهن ۾ معاهدو ممڪن آهي.
عالمي ميڊيا رپورٽن موجب صدر ٽرمپ چيو آهي ته آمريڪا ۽ ايران وچ ۾ جنگ ختم ڪرڻ جو دستاويز آخري مرحلن ۾ آهي ۽ جلد دستخط ٿي سگهن ٿا.
ٽرمپ چيو ته معاهدي تي صحيحن کانپوءِ آبنائي هرمز کي سمورن ملڪن لاءِ مڪمل طور کوليو ويندو، جڏهن ته هن اها به دعويٰ ڪئي ته مستقبل ۾ ايران جو ايٽمي مواد آمريڪا جي قبضي ۾ اچي سگهي ٿو.
ٻئي طرف ايراني عملدارن اصولي طور تي معاهدي تي اڳڀرائي جي تصديق ڪندي چيو آهي ته دستاويز تي غور ڪيو پيو وڃي پر اهو چوڻ وقت کان اڳڀرائي آهي ته صحيحون اڄ ٿينديون. ايراني موقف موجب، معاهدو ايندڙ ڪجهه ڏينهن ۾ ٿي سگهي ٿو.
ان دوران علائقي ۾ ڇڪتاڻ جاري آهي. ڏکڻ لبنان ۾ ڌماڪن ۽ اسرائيلي حملن جا اطلاع مليا آهن. ايران جو چوڻ آهي ته جيڪڏهن خطي ۾ جامع جنگ بندي ٿيڻي آهي ته ان کي لبنان سميت سمورن محاذن تي لاڳو ڪيو وڃي.
ان سان گڏ ايراني ميڊيا ٻڌايو آهي ته ايران جي مرحوم سپريم ليڊر آيت الله علي خامنه اي جي جنازي نماز ۽ تدفين جو شيڊول به جاري ڪيو ويو آهي. رپورٽن مطابق تهران ۾ تدفين جون تقريبون 4 جولاءِ تي شروع ٿينديون، جڏهن ته تدفين 9 جولاءِ تي مشهد ۾ ٿيندي.
سياسي مبصرن موجب جيڪڏهن آمريڪا ۽ ايران وچ ۾ تجويز ڪيل معاهدو ٿي ويو ته اهو وچ اوڀر جي تازي تاريخ ۾ اهم ترين سفارتي پيش رفت ثابت ٿي سگهي ٿو، جنهن جا عالمي معيشت، تيل جي مارڪيٽن ۽ علائقائي سلامتي تي اثر پوندا.
