اسلام آباد:
اسلام آباد هاءِ ڪورٽ قرار ڏنو آهي ته بينڪ قانوني سبب کانسواءِ شهرين جا بئنڪ اڪائونٽ بلاڪ يا منجمد نٿا ڪري سگهن، اين سي سي آءِ اي به بغير ڪنهن سبب جي شهرين جا بئنڪ اڪائونٽ بلاڪ يا منجمد ڪرڻ جي درخواست نٿي ڏئي سگهي.
عدالت چيو ته اهو مناسب آهي ته اسٽيٽ بئنڪ ان ڳالهه کي يقيني بڻائڻ لاءِ قدم کڻي ته مستقبل ۾ بنا سبب اڪائونٽ بلاڪ ڪرڻ سان شهري متاثر نه ٿين، احتياطي تدبيرن بابت سمورن بئنڪن کي هدايتون جاري ڪرڻ تي غور ڪيو وڃي.
عدالت بغير ڪنهن سبب جي بئنڪ اڪائونٽ بلاڪ ڪرڻ جي غلطي جو اعتراف ڪندي چيو ته خانگي بئنڪ گراهڪ جي درخواست تي آيل 3 لک رپيا خرچ ادا ڪري.
جسٽس ارباب طاهر اين سي سي آءِ اي جي انڪوائري دوران شهري جا اڪائونٽ پاڻمرادو بلاڪ ڪرڻ خلاف ڪيس جو لکت ۾ فيصلو جاري ڪيو. عدالت چيو ته اين سي سي آءِ اي شهري جي بئنڪ ڊيٽا حاصل ڪرڻ لاءِ اي ميل موڪلي، بئنڪ اڪائونٽ جا تفصيل فراهم ڪرڻ کانپوءِ پاڻمرادو اڪائونٽ بلاڪ ڪري ڇڏيو.
بئنڪ اڪائونٽ بغير ڪنهن سبب جي بلاڪ ڪري ڇڏيو، جنهن سبب شهري کي عدالت ۾ اچڻو پيو، بئنڪ هڪ مهيني ۾ درخواستگذار کي ٽي لک رپيا ادا ڪري عملدرآمد رپورٽ جمع ڪرائي ڇڏي.
اسٽيٽ بئنڪ خانگي بئنڪن تي واضح ڪري ته قانوني جواز کانسواءِ بئنڪ اڪائونٽس جو استعمال بند نٿو ڪري سگهجي ته مستقبل ۾ بنا سبب اڪائونٽ بلاڪ ڪري شهرين کي متاثر ٿيڻ کان روڪڻ لاءِ قدم کنيا وڃن.
اسٽيٽ بئنڪ ان ڳالهه کي يقيني بڻائڻ لاءِ ميڪنزم جوڙي سگهي ٿو ته اڪائونٽ هولڊر غير ضروري طور تي متاثر نه ٿين، ڪنهن کي به مضبوط قانوني سبب کان سواءِ ان جي ملڪيت تائين رسائي کان محروم نه ڪيو وڃي.
