ڪوئيٽا:
بليلي روڊ ڪچلاڪ بائي پاس تي نامعلوم هٿياربندن جي فائرنگ جي نتيجي ۾ خانگي هوٽل جو مالڪ ۽ مشهور واپاري محمد هاشم نورزئي مارجي ويو.
پوليس موجب، واقعو ڇنڇر جي صبح جي وقت ڪچلاڪ ٿاڻي جي حد ۾ عثمانيه هوٽل جي ويجهو پيش آيو. وزيرآباد ڪچلاڪ جو رهواسي محمد هاشم نورزئي پنهنجي خانگي گاڏي ۾ گهر کان شهر وڃي رهيو هو ته موٽرسائيڪل تي سوار 3 کان 4 نامعلوم هٿياربندن سندس گاڏي تي انڌاڌنڌ فائرنگ ڪري ڏني.
فائرنگ جي نتيجي ۾ محمد هاشم نورزئي موقعي تي ئي سخت زخمي ٿي پيو، جڏهن ته واقعي بعد جوابدار فرار ٿيڻ ۾ ڪامياب ٿي ويا.
پوليس موجب مقتول جي گاڏي تي گولين جا ڪيترائي نشان مليا آهن. اکين ڏٺن شاهدن جو چوڻ آهي ته واقعي جي هڪ ڪلاڪ کانپوءِ پوليس واقعي واري هنڌ پهتي، جڏهن ته محمد هاشم نورزئي اڳ ئي فوت ٿي چڪو هو.
سندس لاش کي سندس هڪ دوست سول اسپتال پهچايو، جتي ڊاڪٽرن موجب محمد هاشم نورزئي کي 3 گوليون لڳيون، هڪ کي مٿي ۾ ۽ 2 هٿ ۾. مٿي تي لڳل گولي موتمار ثابت ٿي.
پوليس ترجمان واقعي جي تصديق ڪندي چيو ته واقعي واري هنڌ تان ثبوت گڏ ڪيا ويا آهن، مختلف رخن کان جاچ جاري آهي. سي سي ٽي وي فوٽيجز، اکين ڏٺن شاهدن جا بيان ۽ ٻين ثبوتن جي مدد سان حملي آورن جي سڃاڻپ ڪرڻ جي ڪوشش ڪئي پئي وڃي.
شروعاتي طور تي قتل جو ڪارڻ معلوم نه ٿي سگهيو، جڏهن ته وارثن موجب مقتول جي ڪنهن سان ذاتي دشمني نه هئي.
واضح رهي ته محمد هاشم نورزئي خانگي هوٽل جو مالڪ هو ۽ هو هوٽل انڊسٽري، افغان ٽرانزٽ ٽريڊ ۽ ٻين ڪاروباري سرگرمين ۾ به ملوث هو. هو ڪاروباري حلقن ۾ هڪ بااثر ۽ سماجي شخصيت طور سڃاتو ويندو هو.
واقعي کانپوءِ واپاري برادري ۾ سخت خدشا آهن. واپاري اڳواڻن جو چوڻ آهي ته هي واقعو نه رڳو هڪ خاندان پر پوري واپاري برادري لاءِ وڏو ڌڪ آهي، جڏهن ته واپارين جي سيڪيورٽي تي به سنگين سوال اٿاريا پيا وڃن.
