ڀارتي رياست تلنگانا جي راڄڌاني حيدرآباد ۾ امريڪي قونصليٽ جي ڀرسان هڪ وڏي روڊ جو نالو تبديل ڪري ڊونلڊ ٽرمپ ايونيو رکيو ويو آهي.
ميڊيا رپورٽن موجب ان قدم جتي سفارتي حلقن ۾ ڌيان ڇڪايو آهي، اتي ڀارتي سياست ۾ به هڪ نئين بحث کي جنم ڏنو آهي. تلنگانا حڪومت آمريڪي آزادي جي 250 هين سالگرهه جي جشن جي سلسلي ۾ نالو تبديل ڪرڻ جي تقريب منعقد ڪئي.
ان موقعي تي هندستان ۾ آمريڪي سفير سرجيو گور ۽ تلنگانا جي ڊپٽي وڏي وزير ميلو ڀٽي ويڪرمارڪا نئين يادگاري تختي جي پڌرائي ڪئي. تقريب ۾ رياستي عملدارن، آمريڪي سفارتڪارن ۽ واپارين پڻ شرڪت ڪئي.
روڊ حيدرآباد جي مالياتي ضلعي ۾ واقع آهي، جتي آمريڪي قونصل خانو واقع آهي ۽ ڪيترن ئي آمريڪي ٽيڪنالاجي ڪمپنين جهڙوڪ مائڪروسافٽ، گوگل ۽ ايمازون جون آفيسون پڻ ويجهو آهن.
تلنگانا حڪومت جو چوڻ آهي ته نالو صرف هڪ شخصيت جي اعزاز ۾ نه آهي پر هندستان ۽ آمريڪا جي وچ ۾ وڌندڙ اقتصادي، ٽيڪنالاجي ۽ سيڙپڪاري لاڳاپن جي علامت آهي.
آمريڪي صدر ڊونلڊ ٽرمپ ان فيصلي تي خوشي جو اظهار ڪندي ڀارت جو شڪريو ادا ڪندي چيو ته هو ان اعزاز تي فخر محسوس ڪري ٿو. هن چيو ته ڀارت ۾ آمريڪي صدر جي نالي سان روڊ جو نالو رکڻ ٻنهي ملڪن جي لاڳاپن جي اهميت کي ظاهر ڪري ٿو.
