اسرائيل ۽ ايران وچ ۾ ڇڪتاڻ ۾ نئين سر ڇڪتاڻ جو خدشو پيدا ٿي ويو آهي، جڏهن ته اسرائيلي ميڊيا دعويٰ ڪئي آهي ته گذريل 24 ڪلاڪن دوران بارود ۽ فوجي سامان کڻندڙ درجنوں آمريڪي ڪارگو جهاز اسرائيل پهچي ويا آهن.
اسرائيلي ميڊيا جي رپورٽن موجب اهي آمريڪي جهاز مختلف فوجي اڏن تي لينڊ ڪيا جتي هٿيار، ميزائل ۽ ٻيو جنگي سامان پهچايو ويو. رپورٽن ۾ دعويٰ ڪئي وئي آهي ته اها پيش رفت ايران جي خلاف ممڪن نئين جنگ جي تيارين جو حصو ٿي سگهي ٿي.
ميڊيا رپورٽن ۾ چيو ويو آهي ته گذريل ڪجهه هفتن ۾ خطي جي صورتحال اڳ ۾ ئي انتهائي ڇڪتاڻ واري آهي ۽ آمريڪا اسرائيل کي مسلسل فوجي مدد فراهم ڪري رهيو آهي. ان حوالي سان آمريڪي ڪارگو جهازن جي آمد کي هڪ غير معمولي پيش رفت قرار ڏنو پيو وڃي.
جيتوڻيڪ ان رپورٽ تي آمريڪي يا اسرائيلي اهلڪارن طرفان ڪوبه باضابطه ردعمل سامهون نه آيو آهي، پر تجزيه نگارن جو چوڻ آهي ته وچ اوڀر ۾ وڌندڙ ڇڪتاڻ سبب صورتحال ڪنهن به وقت خراب ٿي سگهي ٿي.
ٻئي طرف ايران اڳ ئي واضح ڪري چڪو آهي ته ڪنهن به امڪاني حملي يا دٻاءُ جو ڀرپور جواب ڏنو ويندو، جڏهن ته خطي ۾ جنگ بندي ۽ سفارتي ڪوششن جي مستقبل تي به سوال اٿاريا پيا وڃن.
