واشنگٽن:
آمريڪي صدر ڊونلڊ ٽرمپ ايران جي حوالي سان هڪ ڀيرو ٻيهر سخت موقف اختيار ڪندي چيو آهي ته تهران تي بار بار حملن جا امڪان موجود آهن ۽ هن وقت تائين ايران پنهنجي عمل جي وڏي قيمت ادا ناهي ڪئي.
سوشل ميڊيا پليٽ فارم ٽرٿ سوشل تي جاري ڪيل بيان ۾ صدر ٽرمپ چيو ته کيس ايران طرفان پيش ڪيل امڪاني ڊيل جي تجويزن کان آگاهه ڪيو ويو آهي پر هو جلد ان جي تفصيل جو جائزو وٺندو.
هن شڪ جو اظهار ڪندي چيو ته اهو تصور ڪرڻ مشڪل آهي ته ايران جي آڇ قبول ٿيندي.
آمريڪي صدر چيو ته آمريڪا جي ايران سان ڳالهين جي صلاحيت لامحدود آهي پر ان سان گڏ خبردار ڪيو ته جيڪڏهن ضرورت پئي ته وڌيڪ سخت قدم کنيا پيا وڃن.
سندس چوڻ هو ته آبنائے هرمز ۾ آمريڪي حڪمت عملي هڪ دوستانه بندش آهي جنهن جو مقصد خطي ۾ توازن برقرار رکڻ آهي.
ٽرمپ ايراني قيادت کي تنقيد جو نشانو بڻائيندي چيو ته قيادت ۾ واضح ڪوآرڊينيشن ناهي ۽ مختلف بيان ان ڳالهه جي عڪاسي ڪن ٿا ته فيصلي جو مرڪز واضح ناهي.
هن هڪ ٻيو اهم اعلان ڪندي چيو ته آمريڪا جرمني مان 5 هزار کان وڌيڪ فوجي اهلڪار واپس گهرائڻ وارو آهي، جنهن کي دفاعي حڪمت عملي ۾ وڏي تبديلي چيو پيو وڃي.
ياد رهي ته صدر ٽرمپ اڳ ئي واضح ڪري چڪو آهي ته هو ايران کي ايٽمي هٿيارن جي حصول ۾ ڏسڻ نٿو چاهي ۽ ان حوالي سان واشنگٽن جي پاليسي سخت دٻاءُ ۽ ممڪن قدمن جي چوڌاري گهمي رهي آهي.
