ڪراچي:
ڪراچي ۾ پاڻي جو بحران ختم نه ٿي رهيو آهي، شهر جي مختلف علائقن ۾ 9 ڏينهن کان پاڻي جي فراهمي بند آهي.
ايڪسپريس نيوز موجب ڪراچي ۾ پاڻي جو بحران بدترين شڪل اختيار ڪري ويو آهي، 25 اپريل کان اڪثر علائقن ۾ پاڻي جي فراهمي بند آهي، جڏهن ته 27 اپريل تي ڌاٻيجي پمپنگ اسٽيشن تي بجلي جي بريڪ ڊائون سبب پاڻي جو نظام درهم برهم ٿي ويو آهي.
بريڪ ڊائون سبب 3 مين لائينون ڦاٽي ويون، جن مان ٻن لائينن جي مرمت جو ڪم مڪمل ڪيو ويو آهي پر لائين نمبر 2 جو ڪم اڃا تائين مڪمل نه ٿي سگهيو آهي، جنهن سبب ڪراچي جي ڪيترن ئي علائقن ۾ پاڻي جي فراهمي بند ٿي وئي آهي. جنهن ۾ ڪورنگي، لانڍي، ملير، شاهه فيصل ڪالوني، گلستان جوهر، گلشن اقبال، لياقت آباد، پي آءِ بي ڪالوني اولڊ سٽي ايريا، محمد آباد، منظور ڪالوني، ڪورنگي ڪراسنگ، ڊفينس ڪلفٽن سميت ڪيترن ئي علائقن ۾ پاڻي جي فراهمي سخت متاثر ٿي رهي آهي. شهر جو وڏو حصو پاڻي کان محروم آهي.
ذريعن جو چوڻ آهي ته شهر ۾ لائينن ذريعي پاڻي جي فراهمي بند آهي، جڏهن ته سرڪا ري هائيڊرنٽس تي هڪ ڏينهن به پاڻي بند ناهي ڪيو ويو، جنهن سبب شهرين ۾ ڏکيائي پيدا ٿي وئي آهي، جڏهن ته ترجمان واٽر ڪارپوريشن دعويٰ ڪئي آهي ته شهر کي 650 ملين گيلن جي مقابلي ۾ روزانو 610 ملين گيلن پاڻي فراهم ڪيو پيو وڃي، رڳو 40 ملين گيلن پاڻي فراهم نه ڪيو پيو وڃي.
واٽر اينڊ سيوريج ڪارپوريشن جي ترجمان چيو ته پي آر سي سي لائين جي مرمت جو ڪم ڪاميابي سان مڪمل ڪري ورتو آهي، جنهن کانپوءِ شهر جي مختلف متاثر علائقن ۾ پاڻي جي فراهمي بحال ڪئي وئي آهي.
واٽر ڪارپوريشن جي ترجمان موجب مرمتي ڪم مڪمل ٿيڻ سان ئي ڪورنگي، ملير، چنيسر، جناح، صدر، ڪلفٽن ۽ ڊي ايڇ اي سميت ٻين علائقن ۾ پاڻي جي فراهمي بحال ٿيڻ شروع ٿي وئي آهي ۽ صورتحال بهتر ٿي رهي آهي.
ترجمان چيو ته شهر کي هن وقت 610 ملين گيلن پاڻي فراهم ڪيو پيو وڃي جڏهن ته روزانو 650 ملين گيلن پاڻي جو شارٽ فال رڳو 40 ملين گيلن آهي، جنهن کي جلد پورا ڪرڻ لاءِ قدم کنيا پيا وڃن.
هن چيو ته گذريل ڏينهن اوچتو بجلي جي بريڪ ڊائون سبب ڌاٻيجي پمپنگ اسٽيشن جي اهم تنصيبات متاثر ٿي، جنهن سبب پاڻي پهچائڻ جو نظام متاثر ٿيو ۽ شهر جي مختلف علائقن ۾ سپلاءِ به متاثر ٿي. بهرحال، صورتحال هاڻي تمام گهڻو بهتر ٿي چڪي آهي ۽ سامان آهستي آهستي بحال ڪيو ويو آهي.
