اي اين ايف ملڪ جي مختلف شهرن ۾ تعليمي ادارن جي چوگرد منشيات فروشن خلاف ڪريڪ ڊائون ڪندي 8 ڪاررواين دوران 10 جوابدارن کي گرفتار ڪري ورتو آهي. ڪارروائين ۾ 70 لک رپين کان وڌيڪ ماليت جي 52.67 ڪلوگرام منشيات هٿ ڪئي وئي.
تعليمي ادارن ۾ ڪارروائي دوران سينٽرل پارڪ ڊي ايڇ اي اسلام آباد ويجهو 3 گاڏين مان 625 گرام چرس ۽ 178 گرام چرس هٿ ڪري 5 جوابدارن کي گرفتار ڪيو ويو. ڪراچي جي فاروق اعظم چوڪ وٽ رڪشا مان 300 گرام برف هٿ ڪري هڪ جوابدار کي گرفتار ڪيو ويو. گرفتار جوابدارن تعليمي ادارن جي شاگردن کي منشيات وڪرو ڪرڻ جو به اعتراف ڪيو آهي.
ٻين ڪارروائين ۾ اسلام آباد ايئرپورٽ تي بحرين ويندڙ مسافر جي بيگ مان 1.030 ڪلو برف هٿ ڪري جوابدار کي گرفتار ڪيو ويو. اسلام آباد ايئرپورٽ تي هڪ ٻي ڪارروائي دوران بحرين ويندڙ مسافر جي بيگ مان 1.032 ڪلو برف هٿ ڪئي وئي.
لاهور ۾ ڪوريئر آفيس مان دبئي ويندڙ پارسل ۾ فوٽو ڪاپي ٿيل ڪتاب ۾ جذب ٿيل 805 گرام ڪينابينوڊ هٿ ڪيو ويو. جي ٽي روڊ اٽڪ ڀرسان ٽرڪ مان 7.7 ڪلو چرس هٿ ڪري 2 جوابدارن کي گرفتار ڪري ورتو.
سرگل دالبندين ڀرسان ٻڪرين ۾ لڪايل 35 ڪلوگرام آفيم هٿ، پشاور ڪارخانو مارڪيٽ ۾ واقع ڪوريئر آفيس جي 3 پارسلن مان سولر لائيٽن مان 6 ڪلو برف هٿ ڪئي وئي.
سمورن جوابدارن خلاف اينٽي نارڪوٽڪس ايڪٽ 1997 تحت ڪيس داخل ڪري جاچ شروع ڪئي وئي آهي.
