اڳوڻي سينيٽر مشتاق احمد خان جي پارٽي پاڪستان رائيٽس موومينٽ اپوزيشن اتحاد تحريڪ تحفظ آئين پاڪستان ۾ شامل ٿي وئي ۽ آئين جي بالادستي، جمهوريت ۽ انساني حقن لاءِ گڏيل جدوجهد جو اعلان ڪري ڇڏيو. اسلام آباد ۾ گڏيل پريس ڪانفرنس ڪندي پاڪستان رائيٽس موومينٽ ۽ تحريڪ تحفظ ايوان پاڪستان گڏجي سياسي جدوجهد جاري رکڻ جو اعلان ڪندي چيو ته هو ملڪ ۾ حقيقي جمهوريت، آزاد عدليه ۽ آئين جي بالادستي لاءِ گڏيل ڪردار ادا ڪندا. مصطفيٰ نواز کوکر چيو ته هو سينيٽر مشتاق احمد خان جو شڪر گذار آهيان جنهن کيس دعوت ڏني. سينيٽر مشتاق احمد گذريل ڪيترن ئي سالن کان فلسطين سميت سڄي دنيا جي مظلوم مسلمانن جو آواز بلند ڪري رهيو آهي ۽ ظالم رياستن آڏو سچ ڳالهائڻ تي کيس مشڪلاتن کي به منهن ڏيڻو پيو. هن چيو ته ٻئي پارٽيون ملڪي مسئلن جي حل ۽ عوام جي حقن لاءِ گڏيل سياسي سفر جاري رکنديون. سينيٽر مشتاق احمد چيو ته پاڪستان آئين تحفظ موومينٽ ۽ پاڪستان رائٽس موومينٽ حقيقي جمهوريت، آزاد عدليه ۽ عوام جي حقن لاءِ گڏجي جدوجهد ڪندا. فلسطينين جي صورتحال تي ڳڻتي جو اظهار ڪندي هن چيو ته اسرائيلي جيلن ۾ هزارين فلسطيني قيدي غير انساني سلوڪ کي منهن ڏئي رهيا آهن جڏهن ته پاڪستان کي فوري طور تي ”بورڊ آف پيس“ مان هٿ کڻڻ گهرجي. حڪومت تي تنقيد ڪندي هن چيو ته پيٽرول تي وڏا ٽيڪس لڳايا پيا وڃن، مهانگائي ۽ دهشتگردي وڌي رهي آهي ۽ عوام ناڪام پاليسين جي قيمت ادا ڪري رهيو آهي. مخالف ڌر جي اڳواڻ زبير عمر چيو آهي ته ملڪ ۾ مهانگائي ۽ غربت بلند ترين سطح تي پهچي وئي آهي، حڪومت معيشت کي منظم ڪرڻ ۾ ناڪام ٿي وئي آهي. هن چيو ته حڪومت تيل جي عالمي قيمتن کي جواز بڻائي رهي آهي، جڏهن ته ڀارت ۽ بنگلاديش ۾ صورتحال مختلف آهي، ايندڙ بجيٽ ۾ عوام تي وڌيڪ بار وجهڻ جو خدشو آهي. علامه راجا ناصر عباس چيو ته سينيٽر مشتاق احمد مظلوم مسلمانن لاءِ جرئت سان آواز اٿاريو آهي، ملڪ ۾ عدليه، اليڪشن ڪميشن ۽ پارليامينٽ آزاد ناهي. محمود خان اچڪزئي چيو ته ملڪ خطرناڪ صورتحال طرف وڌي رهيو آهي، جمهوريت کي نقصان پهچايو ويو آهي، پاڪستان جو آئين ئي ملڪ جو پابند آهي. هن چتاءُ ڏنو ته جيڪڏهن سياسي قوتون آئين جي حفاظت لاءِ اڳيان نه آيون ته صورتحال خراب ٿي سگهي ٿي.
Source link
Leave a Comment Leave a Comment
