ٽوڪيو: آمريڪا ۽ ايران وچ ۾ ٿيل تازي معاهدي جي باوجود آبنائے هرمز ۾ سامونڊي ٽريفڪ کي مڪمل طور تي بحال ڪرڻ ۾ ڪيترائي هفتا لڳي سگهن ٿا.
جاپان جي معروف شپنگ ڪمپني مٽسئي او ايس جي لائنز جي سربراهه خبردار ڪيو آهي ته جهاز جا مالڪ فوري طور تي اهم پاڻي واري رستي تي ٻيهر ٻيڙيون هلائڻ لاءِ تيار نه آهن.
برطانوي اخبار فنانشل ٽائمز سان ڳالهائيندي ڪمپني جي چيف ايگزيڪيوٽو جوتارو تمورا چيو ته رڳو معاهدي جو اعلان ڪافي نه هوندو پر زميني حقيقتن ۾ واضح تبديلي کي به ڏسڻو پوندو.
هن چيو ته شپنگ ڪمپنين کي يقين ڏياريو وڃي ته آبنائے هرمز ۾ سيڪيورٽي صورتحال واقعي بهتر ٿي چڪي آهي ۽ جهازن کي ڪنهن به فوجي يا سيڪيورٽي خطرن کي منهن نه ڏيڻو پوندو. سندس چوڻ هو ته لاڳاپيل ملڪن وچ ۾ ٿيل معاهدي جا عملي نتيجا سامهون اچڻ کانپوءِ ئي شپنگ لائينز اعتماد سان ان رستي کي ٻيهر استعمال ڪرڻ شروع ڪنديون.
جوتارو تمورا چيو ته اهو ضروري آهي ته معاهدي کي عملي طور تي عمل ۾ ڏٺو وڃي، نه رڳو ڪاغذ تي، ته جيئن جهاز مالڪ ۽ انشورنس ڪمپنيون محفوظ محسوس ڪري سگهن.
ياد رهي ته آبنائي هرمز دنيا جي اهم ترين شپنگ رستن مان هڪ آهي، جنهن ذريعي عالمي سطح تي تيل ۽ گئس جو وڏو مقدار منتقل ڪيو ويندو آهي. آمريڪا ۽ ايران وچ ۾ تازي ڇڪتاڻ ۽ جنگ جي صورتحال سبب ڪيترين ئي شپنگ ڪمپنين پنهنجن جهازن جي آمد و رفت کي محدود ڪري ڇڏيو آهي.
ماهرن موجب جيتوڻيڪ آمريڪا ۽ ايران وچ ۾ معاهدو خطي ۾ ڇڪتاڻ گهٽائڻ لاءِ هڪ اهم قدم آهي پر عالمي شپنگ انڊسٽري اڃا به محتاط انداز ۾ صورتحال جو جائزو وٺي رهي آهي.
