آمريڪي صدر ڊونلڊ ٽرمپ ايران طرفان جنگ بندي ڳالهين جي معطلي تي ردعمل ڏيندي چيو آهي ته هن سان ڪو به ”مسئلو“ ناهي.
عالمي خبرون ڏيندڙ اداري موجب آمريڪي صدر ڊونلڊ ٽرمپ چيو آهي ته ايران آمريڪا سان ڳالهيون معطل ڪرڻ جي فيصلي بابت اڳواٽ اطلاع ناهي ڏنو پر جيڪڏهن هو ڳالهيون روڪڻ چاهي ٿو ته ان تي کيس ڪو به اعتراض ناهي.
اين بي سي سان مختصر ٽيليفونڪ ڳالهه ٻولهه ۾ صدر ٽرمپ اهو به واضح ڪيو ته ايران سان ڳالهيون معطل ڪرڻ جو مطلب اهو ناهي ته اسان فوري طور تي اتي وڃڻ وارا آهيون ۽ هر هنڌ بمباري شروع ڪري ڇڏينداسين.
”مون کي واقعي پرواه ناهي ،“ صدر ٽرمپ چيو. جيڪڏهن ڳالهه ٻولهه ختم ٿي چڪي آهي، اهي ٿي ويا آهن، ۽ جيڪڏهن اهي جاري آهن، ڪو مسئلو ناهي.
هن وڌيڪ چيو ته مان سمجهان ٿو ته ايران ڳالهين لاءِ گهڻو وقت ورتو. هاڻي اهو عمل تمام ڊگهو ٿي چڪو هو ۽ سچ اهو آهي ته اهي ڳالهيون تمام گهڻي تڪليف ڏيندڙ ٿي چڪيون هيون.
ياد رهي ته ڪجهه عرصو اڳ ايران جي نيم سرڪاري نيوز ايجنسي تسنيم دعويٰ ڪئي هئي ته ايراني مذاکراتي ٽيم لبنان ۾ اسرائيلي فوجي ڪارروائين خلاف احتجاج ڪندي ثالثن ذريعي آمريڪا سان هلندڙ اڻ سڌي طرح ڳالهين کي ملتوي ڪري ڇڏيو آهي.
ايران جو موقف آهي ته لبنان ۾ جنگبندي به ايران ۽ آمريڪا وچ ۾ طئي ٿيل وسيع جنگ بندي فريم ورڪ جو حصو هئي پر اسرائيلي حملن ذريعي ان جي ڀڃڪڙي ڪئي وئي آهي.
تسنيم نيوز موجب ايراني ڳالهين واري ٽيم فيصلو ڪيو آهي ته جيستائين غزه ۽ لبنان ۾ اسرائيلي فوجي آپريشن بند نه ڪيو ويندو ۽ لبنان مان اسرائيلي فوجون واپس نه ورتيون وينديون، تيستائين آمريڪا سان ڳالهيون نه ٿينديون.
ٻئي پاسي ايراني پرڏيهي وزير عباس عراقچي چيو آهي ته ايران ۽ آمريڪا وچ ۾ جنگ بندي لبنان سميت سمورن محاذن تي لاڳو آهي.
هن وڌيڪ چيو ته هڪ محاذ تي جنگبندي جي ڀڃڪڙي کي سمورن محاذن تي جنگبندي جي ڀڃڪڙي سمجهيو ويندو، آمريڪا ۽ اسرائيل نتيجن جا ذميوار هوندا.
سفارتي بحران تڏهن شروع ٿيو جڏهن اسرائيلي وزيراعظم پنهنجي فوجن کي بيروت جي ڏکڻ ۾ دحيا واري علائقي تي حملو ڪرڻ جو حڪم ڏنو، جنهن کي حزب الله جو مکيه قلعو سمجهيو وڃي ٿو.
اسرائيلي ذريعن موجب انهن حملن جا منصوبا به آمريڪا سان صلاح مشورا ڪيا ويا هئا.
