آمريڪي صدر ڊونلڊ ٽرمپ جي 7 اجلاس جي موقعي تي صحافين سان ڳالهه ٻولهه ڪندي لبنان ۾ حزب الله خلاف اسرائيل جي فوجي ڪارروائين تي سخت تنقيد ڪئي آهي.
عالمي خابرو اداري موجب آمريڪي صدر اسرائيل تي ڪاوڙ جو اظهار ڪندي چيو آهي ته لبنان ۾ جنگ کي ضرورت کان وڌيڪ طويل ڪيو ويو آهي، جنهن ۾ وڏي انگ ۾ شهري مارجي رهيا آهن.
هن اسرائيلي فوج جي سيڪيورٽي آپريشن تي تنقيد ڪندي چيو ته هڪ گهربل شخص جي ڳولا ۾ پوري رهائشي اپارٽمنٽ کي تباهه ڪرڻ درست ناهي ڇو ته اتي رهندڙ سڀئي ماڻهو حزب الله جا ميمبر ناهن.
آمريڪي صدر واضح لفظن ۾ چيو ته هو لبنان ۽ حزب الله جي معاملي ۾ اسرائيل جي رويي کان خوش ناهي. اسرائيل کي اهو آپريشن تمام تيزيءَ سان مڪمل ڪرڻ گهرجي ها، پر جنگ جي مسلسل طويل ٿيڻ سان ايران ڊيل تي منفي اثر پئجي رهيا آهن.
صدر ٽرمپ پنهنجي ناراضگي جو اظهار ڪندي خاص طور تي آچر تي ڏکڻ بيروت واري علائقي تي اسرائيلي حملي جو حوالو ڏنو ۽ چيو ته لبنان ۾ حملو آمريڪا ۽ ايران وچ ۾ عبوري امن معاهدي جي اعلان کان ڪلاڪ اڳ نه ٿيڻ گهرجي ها ڇو ته ان سان سفارتي ڪوششن کي نقصان پهتو آهي.
آمريڪي صدر انڪشاف ڪيو ته هن اسرائيلي قيادت کي صلاح ڏني آهي ته شام ۾ حزب الله خلاف آپريشن جي اجازت ڏني وڃي. شام جو صدر احمد الشريع اهو ڪم تمام بهتر انداز ۾ ڪري سگهي ٿو ڇاڪاڻ ته شام جو صدر هينئر تائين منهنجي اميدن تي پورو لهي چڪو آهي ۽ هو هڪ قابل اڳواڻ آهي.
ياد رهي ته صدر ٽرمپ پڻ تازو ئي دعويٰ ڪئي هئي ته منهنجي ڪوششن سان اسرائيل ۽ حزب الله وچ ۾ ڇڪتاڻ گهٽ ٿي وئي آهي ۽ ٻنهي ڌرين حملن ۾ گهٽتائي تي اتفاق ڪيو هو، جيتوڻيڪ زمين تي مڪمل جنگبندي برقرار نه ٿي سگهي آهي.
ٻئي طرف اسرائيلي حڪومت حزب الله جي خطري جي خاتمي تائين لبنان ۾ پنهنجي فوجي موجودگي برقرار رکندي. اسرائيلي دفاع واري وزير اسرائيل ڪيٽز اڳ ۾ ئي اعلان ڪري چڪو آهي ته لبنان ۾ قائم سيڪيورٽي زونز کي برقرار رکيو ويندو ۽ حزب الله جي انفراسٽرڪچر خلاف آپريشن جاري رهندو.
ياد رهي ته اهو بيان اهڙي وقت سامهون آيو آهي جڏهن آمريڪا، ايران، اسرائيل ۽ لبنان وچ ۾ ڇڪتاڻ گهٽائڻ لاءِ سفارتي سرگرميون تيز ٿي ويون آهن. ٽرمپ بار بار اسرائيل کي تحمل جي صلاح ڏني آهي.
