سيد مراد علي شاهه جي صدارت هيٺ حيدرآباد ۾ پاڻي منصوبي بابت اهم اجلاس ٿيو، جنهن ۾ صوبائي وزيرن، اعليٰ عملدارن ۽ لاڳاپيل ادارن جي نمائندن شرڪت ڪئي.
اجلاس ۾ ڄام خان شورو، چيف سيڪريٽري آصف حيدر شاهه، چيئرمين پي اينڊ ڊي نجم شاهه، سيڪريٽري فنانس فياض جتوئي ۽ ٻين آفيسرن شرڪت ڪئي.
اجلاس ۾ ٻڌايو ويو ته حيدرآباد جي علائقي قاسم آباد ۾ 6 ايم جي ڊي واٽر ٽريٽمينٽ پلانٽ لڳايو ويندو ته جيئن شهرين کي صاف پاڻي جي بهتر فراهمي يقيني بڻائي سگهجي.
منصوبي لاءِ گوڙ مصري شيخ ۾ 25 ايڪڙ سرڪاري زمين جي نشاندهي ڪئي وئي آهي، جنهن مان 22 ايڪڙ کي اي ون ڪيٽيگري تحت فوري استعمال لاءِ موزون قرار ڏنو ويو آهي.
سنڌ جي وڏي وزير 22 ايڪڙ زمين جي منظوري ڏيندي منصوبي تي فوري عملدرآمد جون هدايتون ڏنيون ۽ چيو ته عوام کي پيئڻ جو صاف پاڻي فراهم ڪرڻ حڪومت جي پهرين ترجيح آهي.
هن هدايت ڪئي ته سمورا قانوني ۽ انتظامي طريقا جلد مڪمل ڪيا وڃن ۽ منصوبي جي بروقت مڪمل ٿيڻ کي يقيني بڻايو وڃي.
اجلاس ۾ بريفنگ دوران ٻڌايو ويو ته ان منصوبي سان قاسم آباد ۽ ڀرپاسي وارن علائقن ۾ پاڻي جي کوٽ تي ضابطو آڻڻ ۾ مدد ملندي جڏهن ته پاڻي صاف ڪرڻ جي صلاحيت ۾ نمايان اضافو ٿيندو.
سيد مراد علي شاهه چيو ته هي منصوبو عوام جي صحت، بهتر معيار زندگي ۽ پائيدار شهري ترقي جي لاءِ هڪ اهم قدم آهي ۽ شفافيت ۽ معيار کي يقيني بڻائڻ لاءِ ان جي سخت نگراني ڪئي ويندي.
