اربع ڏينهن خضدار ۾ پاڪستان پيپلز پارٽي جي اڳواڻ ۽ اهم قبائلي شخصيت مير شفيق الرحمان مينگل جي گهر تي آپگهاتي ۽ هٿياربند دهشتگردن جي حملي ۾ 5 پوليس اهلڪارن سميت 14 ڄڻا مارجي ويا، جڏهن ته جوابي ڪارروائي ۾ 5 دهشتگرد مارجي ويا.
حملي ۾ مير شفيق الرحمان مينگل محفوظ رهيو، جڏهن ته ڪيترائي ماڻهو زخمي ٿي پيا، پوليس ۽ سڪيورٽي ذريعن موجب حملو انتهائي منظم انداز ۾ ڪيو ويو.
شروعات ۾، هڪ آپگهاتي بمبار پاڻ کي رهائشگاهه جي مکيه دروازي تي ڌماڪي سان اڏائي ڇڏيو، جنهن جي داخلي دروازي کي تباهه ڪيو. ٿوري ئي دير ۾ ٻيا آپگهاتي بمبار ۽ هٿياربند حملي آور گهر ۾ داخل ٿيا ۽ انڌاڌنڌ فائرنگ شروع ڪري ڏني.
ذريعن موجب سڪيورٽي اهلڪارن ۽ حملي آورن وچ ۾ لڳ ڀڳ 3 ڪلاڪن تائين فائرنگ جو سلسلو جاري رهيو، جنهن کانپوءِ سڪيورٽي فورسز پنجن حملي آورن کي ماري ڇڏيو.
واقعي بعد سڪيورٽي فورسز، پوليس ۽ ٻين قانون لاڳو ڪندڙ ادارن علائقي کي گهيري ۾ آڻي سرچ آپريشن شروع ڪري ڇڏيو، جڏهن ته فوتين ۽ زخمين کي فوري طور تي سي ايم ايڇ ۽ ٽيچنگ اسپتال خضدار منتقل ڪيو ويو.
بلوچستان جي وڏي وزير مير سرفراز بگٽي حملي جي سخت مذمت ڪندي چيو آهي ته امن دشمن عناصر بلوچستان جي امن، استحڪام ۽ عوامي اتحاد کي نقصان پهچائڻ چاهين ٿا پر حڪومت، عوام ۽ سيڪيورٽي ادارن جي عزم جي سامهون دهشتگرد ڪڏهن به ڪامياب نه ٿيندا.
هن چيو ته مير شفيق الرحمان مينگل جنهن بهادري، جرئت ۽ ثابت قدمي سان دهشتگردن جو مقابلو ڪيو اهو قابل تعريف آهي ۽ دهشتگردن آڏو جهڪي نه پوڻ قومي عزم جو بهترين مثال آهي.
وڏي وزير قانون لاڳو ڪندڙ ادارن کي هدايت ڪئي ته حملي ۾ ملوث دهشتگردن ۽ انهن جي سهولتڪارن کي جلد کان جلد گرفتار ڪري انصاف جي ڪٽهڙي ۾ آندو وڃي.
شفيق مينگل کي ماضي ۾ به نشانو بڻايو ويو، مير شفيق الرحمان مينگل ان کان اڳ به دهشتگردن جو نشانو بڻجي چڪو آهي.
30 ڊسمبر 2011ع تي ڪوئيٽا جي ارباب ڪرم خان روڊ تي سندس رهائشگاهه ٻاهران ڪار بم ڌماڪو ٿيو، جنهن ۾ 13 ڄڻا مارجي ويا ۽ 30 کان وڌيڪ زخمي ٿيا.
ان حملي ۾ شفيق مينگل ۽ سندس گهرواري به محفوظ رهيا. ان وقت، ڪالعدم بلوچ لبريشن آرمي (بي ايل اي) حملي جي ذميواري قبول ڪئي هئي.
