“سڀني شرطن کي پورو ڪيو؛ پاڪستان لاءِ آءِ ايم ايف فنڊ جي منظوري ۾ ڪا به رڪاوٽ ناهي.

ناڻي واري وزارت جي ذريعن ٻڌايو آهي ته سموريون شرطون پوريون ٿيڻ کانپوءِ پاڪستان لاءِ آءِ ايم ايف فنڊ جي منظوري ۾ ڪا به رڪاوٽ ناهي.

آءِ ايم ايف جي ايگزيڪيوٽو بورڊ جو اجلاس ايندڙ مهيني (مئي) جي پهرئين هفتي ۾ ٿيندو جنهن ۾ پاڪستان جي ٽئين معاشي جائزي ۽ انٽرنيشنل مانيٽري فنڊ (آءِ ايم ايف) جي توسيع ٿيل فنڊ سهولت پروگرام تحت هڪ ارب 20 ڪروڙ ڊالرز جي اسٽاف سطح جي معاهدي جي منظوري ڏني ويندي.

ان حوالي سان ناڻي واري وزارت جي ذريعن جو چوڻ آهي ته پاڪستان انٽرنيشنل مانيٽري فنڊ (آءِ ايم ايف) جون سموريون شرطون پوريون ڪري ورتيون آهن ۽ آءِ ايم ايف کي دوست ملڪن جي قرض جي رول اوور جو يقين ڏياريو ويو آهي، تنهن ڪري هاڻي آءِ ايم ايف کان قرضن جي ايندڙ قسط جي منظوري جي راهه ۾ ڪا به رڪاوٽ ناهي.

ذريعن جو چوڻ آهي ته آءِ ايم ايف جي ايگزيڪيوٽو بورڊ جي ايندڙ مهيني اجلاس ۾ اي ايف ايف تحت قرضن جي ايندڙ قسط ۽ آر ايس ايف پروگرام آف ڪلائميٽ فنانسنگ مان 210 ملين ڊالر جي ايندڙ قسط ملڻ جو امڪان آهي.

ذريعن جو وڌيڪ چوڻ آهي ته پيٽروليم تي ٽارگيٽيڊ سبسڊي بابت آءِ ايم ايف کي اعتماد ۾ ورتو ويو آهي. اهڙي طرح تيل جي عالمي قيمتن ۾ واڌ کي صارفين تائين پهچائڻ کان اڳ آءِ ايم ايف سان صلاح مشورو ڪيو ويو آهي.

ٽارگيٽيڊ سبسڊي جي رقم هلندڙ مالي سال جي بجيٽ مان خرچ ڪئي ويندي ۽ 300 ارب جا ايمرجنسي فنڊ به مشڪل حالتن لاءِ موجود آهن. ذريعن موجب سعودي عرب ۽ يو اي اي وچ ۾ ڊگهي عرصي کان جمع ڪرايل قرضن جي حوالي سان ڳالهيون جاري آهن ۽ اميد آهي ته يو اي اي جلد پاڪستان تي واجب الادا قرض واپس ڪرائيندو.

ذريعن جو چوڻ آهي ته آءِ ايم ايف کي دوست ملڪن جا قرض واپس ڪرڻ جي خاطري ڪرائي وئي آهي، جڏهن ته هن وقت اسٽيٽ بئنڪ آف پاڪستان وٽ سعودي عرب کان 5 ارب ڊالر، چين کان 4 ارب ڊالر ۽ يو اي اي مان 3 ارب ڊالر جا ذخيرا موجود آهن.

يو اي اي جا 2 ارب ڊالر هن مهيني ۽ هڪ ارب ڊالر جولاءِ ۾ واپس ٿيڻا آهن ۽ ان حوالي سان ڪو به مسئلو ناهي. سڀئي ادائگيون بروقت ٿينديون.