اسلام آباد:
سڄي ملڪ ۾ بجلي جي بدترين لوڊشيڊنگ جي معاملي تي پاور ڊويزن طرفان وضاحت سامهون اچي وئي.
پاور ڊويزن جي ترجمان بجلي جي صورتحال تي بيان جاري ڪندي چيو آهي ته گذريل رات جي ڪلاڪن دوران هائيڊرو اليڪٽرڪ پاور جي پيداوار ۾ 1991 ميگا واٽ جي گهٽتائي رڪارڊ ڪئي وئي. هائيڊرو پاور جي پيداوار گهٽ هجڻ سبب پاور ڊسٽري بيوشن ڪمپنين اعلانيل کان ٿورو وڌيڪ لوڊشيڊنگ جو انتظام ڪيو، جڏهن ته گذريل رات پيڪ آورز دوران 4500 ميگاواٽ بجلي جو شارٽ فال رهيو.
بيان ۾ وڌيڪ چيو ويو آهي ته هائيڊرو پاور ۾ گهٽتائي جو سبب ملڪ جي ڊيمن مان صوبن کي پاڻي ڇڏڻ جي گهٽ گهرج آهي. هن وقت صوبا ڊيمن مان پاڻي گهرج مطابق ڇڏي رهيا آهن، جيڪو گذريل سال جي ڀيٽ ۾ تمام گهٽ آهي. ان کان علاوه برساتن ۽ فصلن جي پوکيءَ سبب پاڻيءَ جو خارج ٿيڻ به گهٽ آهي.
ترجمان موجب گذريل رات پيڪ آورز دوران ڪل طلب 18 هزار ميگاواٽ رهي. ايندڙ ڪجهه ڏينهن ۾ ڊيمن مان پاڻي ڇڏڻ جو امڪان آهي، جنهن سان بجلي جي پيداوار ۾ به اضافو ٿيندو.
ترجمان واضح ڪيو ته لوڊ مينيجمينٽ جو شيڊول صرف رات جي وقت مقرر ڪيو ويو آهي. ڏينهن جي ڪلاڪن ۾ ڪو به گهٽتائي نه آهي. هن چيو ته آر ايل اين جي جي دستيابي سان به صورتحال بهتر ٿيندي.
هائيڊرو پاور جي گهٽ دستيابي سبب اضافي لوڊشيڊنگ تي معذرت ڪندي ترجمان صارفين کي اپيل ڪئي آهي ته گهٽ ۾ گهٽ رات جي وقت بجلي استعمال ڪن ۽ بجلي جي بچت جي اصولن تي عمل ڪن.
