امير جماعت اسلامي پاڪستان چيو آهي ته هو عيد کان پوءِ ملڪ ۾ وڏو جلسو ڪندا، موجوده عدالتي نظام عوام کي انصاف فراهم ڪرڻ ۾ ناڪام رهيو آهي.
پشاور ۾ ڪارڪنن جي جلسي کي خطاب ڪندي حافظ نعيم الرحمان چيو ته رڳو سياسي پارٽين جي تبديلي سان ڪو به فرق نه پوندو، اصل مسئلو سڄي نظام کي تبديل ڪرڻ جو آهي. موجوده سياسي پارٽين ۾ رڳو اي ٽي ايم مشينون ئي قيمتي آهن ۽ جيڪي ماڻهو رڳو سيٽن جي سياست ڪرڻ چاهين ٿا انهن کي مسلم ليگ ن، پي ٽي آءِ ۽ پيپلز پارٽي ڏانهن وڃڻ گهرجي، جڏهن ته جيڪي ماڻهو نظام جي تبديلي چاهين ٿا انهن کي جماعت اسلامي ۾ شامل ٿيڻ گهرجي.
مقامي حڪومتن جي مضبوطي تي زور ڏيندي هن چيو ته بيوروڪريسي کي وڌيڪ اختيار ڏيڻ جو ڪو به جواز ناهي، اي سي ۽ ڊي سي کي فنڊ ڏيڻ وارو نظام قبول ناهي، چند ماڻهن جي اجارداري ختم ٿيڻ گهرجي. پاڪستان ۾ تعليم جو بحران سنگين آهي، پنجاب ۾ هڪ ڪروڙ ۽ خيبرپختونخواهه ۾ پنج لک ٻار اسڪولن کان ٻاهر آهن.
حافظ نعيم چيو ته آمريڪا ڪڏهن به مسلمانن جو دوست نٿو ٿي سگهي، ان لاءِ ثالثي جو عمل ٿيڻ گهرجي. 2001ع ۾ پاڪستان آمريڪا جو ساٿ ڏنو پر مدد نه ڪئي. هن چيو ته پاڪستان امن لاءِ ڪردار ادا ڪيو آهي جنهن کي ساراهڻ گهرجي. صدر ڊونلڊ ٽرمپ جي حوالي سان هن چيو ته هو ذليل ٿي ويو آهي، کيس ساڻس ويجهڙائي وڌائڻ بدران باوقار پرڏيهي پاليسي اختيار ڪرڻ گهرجي.
امير جماعت اسلامي وڌيڪ چيو ته جنگبندي جون ڪوششون صحيح رخ ۾ آهن، ايران آبنائے هرمز کولي ڇڏيو آهي جڏهن ته آمريڪا پابندي نه هٽائي آهي. سندس چوڻ هو ته جنگ دوران گذريل ڇهن هفتن ۾ حڪومت کي 180 ارب رپيا مليا ۽ اربين رپيا پيٽرول ليوي ذريعي به گڏ ڪيا ويا. هن ن ليگ ۽ پيپلز پارٽي تي تنقيد ڪندي چيو ته هنن آمريڪي ظلمن ۽ ٽرمپ خلاف واضح موقف ناهي ورتو.
