آمريڪي صدر ڊونلڊ ٽرمپ هڪ ڀيرو ٻيهر پاڪستان جي آرمي چيف فيلڊ مارشل سيد عاصم منير ۽ وزيراعظم شهباز شريف جي ايران سان جنگ بندي معاهدي ۾ ڪردار جي واکاڻ ڪئي.
آمريڪي نشرياتي اداري فاڪس نيوز کي ڏنل انٽرويو ۾ صدر ٽرمپ دعويٰ ڪئي ته ايران سان جنگ لڳ ڀڳ ختم ٿي چڪي آهي ۽ مون کي ان تي پورو يقين آهي.
هن پنهنجي جنگي فيصلن جو دفاع ڪندي چيو ته مون کي اهو قدم کڻڻو پيو ڇاڪاڻ ته جيڪڏهن مان ائين نه ڪريان ها ته ايران ايٽمي هٿيار حاصل ڪري ها ۽ جيڪڏهن وٽس ايٽمي هٿيار هجن ها ته خطي جي صورتحال بلڪل مختلف هجي ها.
آمريڪي صدر وڌيڪ چيو ته هو نٿو چاهي ته وچ اوڀر ۾ طاقت جو توازن اهڙي موڙ تي وڃي جتي ٻيا ملڪ به ايران آڏو جهڪي وڃن، خليجي ملڪ ان تي مون سان گڏ بيٺا آهن.
ان موقعي تي آمريڪي صدر ڊونلڊ ٽرمپ ايران سيز فائر معاهدي ۾ پاڪستان جي ڪردار جي واکاڻ ڪندي آرمي چيف سيد عاصم منير ۽ وزيراعظم شهباز شريف جي تعريف ڪئي.
صدر ٽرمپ وڌيڪ چيو ته فيلڊ مارشل عاصم منير ۽ وزيراعظم شهباز شريف بهترين ماڻهو آهن. پاڪستان ايران سان لاڳاپيل معاملن ۾ ذميوار ۽ مثبت ڪردار ادا ڪيو آهي.
هن چيو ته پاڪستاني قيادت ايران جي ويجهو آهي ۽ معاملا حل ڪرڻ لاءِ به ڪوششون ڪري رهي آهي جيڪا قابل اعتبار هوندي.
آمريڪي صدر امن لاءِ پاڪستاني عوام جي جذبي کي به خراج تحسين پيش ڪيو ۽ چيو ته پاڪستان خطي ۾ استحڪام لاءِ اهم پارٽنر بڻجي اڀري رهيو آهي.
