لاهور:
هائوسنگ ۽ اربن ڊولپمينٽ واري صوبائي وزير بلال ياسين مين هول ۾ ٻارن جي گرڻ جي وڌندڙ واقعن تي ڪاوڙ جو اظهار ڪندي لاڳاپيل آفيسرن کي سخت وارننگ جاري ڪري ڇڏي آهي.
هن واضح ڪيو ته مانيٽرنگ سسٽم ۾ وڌيڪ غفلت يا ڪوتاهي برداشت نه ڪئي ويندي ۽ ذميوار آفيسرن خلاف ڪارروائي ڪئي ويندي.
وڊيو لنڪ ذريعي پنجاب ڊولپمينٽ پلان (پي ڊي پي) تحت منعقد ڪيل ڪارڪردگي جي جائزي واري اجلاس کي خطاب ڪندي بلال ياسين سمورن ضلعن جي واسا جي مئنيجنگ ڊائريڪٽرن کي هدايت ڪئي ته هو فوري طور تي ناقص ۽ کليل مين هولز جي نشاندهي ڪن ۽ جامع رپورٽ ۽ حفاظتي تجويزون پيش ڪن.
هن چيو ته مون سون جي موسم جي آمد کي نظر ۾ رکندي برساتي پاڻي جي نيڪال واري مهم کي بغير ڪنهن وقفي جي جاري رکيو وڃي ۽ سمورن ضلعن ۾ ممڪنه هنگامي صورتحال کي منهن ڏيڻ لاءِ اڳواٽ انتظام مڪمل ڪيا وڃن.
هائوسنگ واري وزير چيو ته موسمياتي تبديلين سبب برساتن جي شدت ۽ مقدار ۾ واڌ جو خدشو آهي، جنهن کي نظر ۾ رکندي وڌيڪ مشينري جلد مختلف ضلعن کي فراهم ڪئي ويندي.
بلال ياسين ڊي جي واسا پنجاب کي هدايت ڪئي ته ڪنهن به ضلعي ۾ ايمرجنسي جي صورت ۾ فوري فراهمي لاءِ سينٽرل پول ۾ اضافي مشينري موجود رکي ته جيئن بروقت ڪارروائي ممڪن ٿي سگهي.
هن ان ڳالهه تي به زور ڏنو ته پنجاب ڊولپمينٽ پلان تحت جاري ترقياتي هدف حاصل ڪرڻ ۾ ڪنهن به قسم جي سستي يا دير کي قبول نه ڪيو ويندو.
هن محرم الحرام جي جلوسن جي رستن تي نيڪال ۽ ٻيا انتظام فوري طور تي مڪمل ڪرڻ جي هدايت ڪندي چيو ته سمورا لاڳاپيل ادارا سڀاڻي تائين تيارين کي حتمي شڪل ڏين.
صوبائي وزير چيو ته عوامي شڪايتن جو فوري ازالو ۽ شهرين کي بروقت رليف فراهم ڪرڻ پنجاب جي وڏي وزير جي اولين ترجيح آهي، جنهن کي هر صورت ۾ يقيني بڻايو ويندو.
