يروشلم: ڪجهه سخت گير اسرائيلي حڪومتي اهلڪارن ۽ انتهائي ساڄي ڌر جي اڳواڻن تي الزام لڳايو ويو آهي ته اهي ڪجهه آمريڪي حلقن جي حمايت سان مسجد الاقصي جي تاريخي ۽ قانوني حيثيت کي تبديل ڪرڻ جي ڪوشش ڪري رهيا آهن.
عالمي ميڊيا جي رپورٽن موجب اسرائيل جا ڪجهه حلقا مسجد اقصيٰ کي باضابطه طور تي ”گهڻن عقيدن جي عبادت گاهه“ قرار ڏيڻ جي تجويز تي ڪم ڪري رهيا آهن. نقادن جو چوڻ آهي ته اهڙو قدم صدين پراڻي ان انتظام جي خلاف هوندو جنهن تحت مسجد اقصيٰ جو انتظام ۽ سار سنڀال اردن جي نگراني هيٺ اسلامي وقف وٽ آهي.
موجوده اسٽيٽس ڪو جي مطابق، غير مسلم مسجد اقصيٰ جو دورو ڪري سگهن ٿا، پر انهن کي اتي مذهبي عبادت يا رسمون ادا ڪرڻ جي اجازت ناهي.
رپورٽن مطابق اسرائيل ۾ ڪجهه انتهاپسند سياستدان مسجد اقصيٰ ۾ يهودي عبادتگاهن کي وڏي پيماني تي متعارف ڪرائڻ جي حق ۾ آهن. اسرائيلي ساڄي ڌر جي اڳواڻ موشي فيگلن تازو ئي مسجد اقصيٰ جو دورو ڪري مذهبي گيت ڳائڻ ۽ اتي نئين عبادت گاهه جي تعمير جي حق ۾ بيان ڏنو.
ٻئي طرف اسرائيل جو قومي سلامتي وارو وزير اتمر بن گوور به ڪيترائي ڀيرا مسجد اقصيٰ جو دورو ڪري چڪو آهي، جنهن تي فلسطين ۽ عرب ملڪن طرفان سخت اعتراض ڪيو ويو آهي. تازن وڊيوز ۾، انهن کي اسرائيلي جهنڊو لڙڪائيندي ۽ الاقصيٰ مسجد جي اسرائيلي ملڪيت جا نعرا لڳائيندي ڏٺو ويو.
اسرائيلي وزيراعظم جي آفيس مسجد الاقصي جي موجوده حيثيت ۾ ڪنهن به قسم جي تبديلي جي دعويٰ کي رد ڪري ڇڏيو آهي، پر فلسطين، اردن ۽ ٻين علائقائي ملڪن ان تي گهري ڳڻتي جو اظهار ڪيو آهي.
ٻئي طرف اسلامي وقف ڪائونسل جي نائب سربراهه ڊاڪٽر مصطفيٰ ابو سوي خبردار ڪيو آهي ته مسجد اقصيٰ جي موجوده حيثيت کي تبديل ڪرڻ جي ڪوشش پوري خطي جي امن کي خطري ۾ وجهي سگهي ٿي. هن چيو ته مسجد اقصيٰ جي معاملي ۾ مداخلت وچ اوڀر ۾ وڌيڪ ڇڪتاڻ ٿي سگهي ٿي.
ان دوران اڻڄاتل اسرائيلي آبادگارن والاريل اولهه ڪناري جي ٻن فلسطيني ڳوٺن ۾ مسجدن کي باهه ڏئي ڇڏي. مقامي اختيارين موجب رام الله جي ويجهو ڳوٺ جلجيليا ۾ مسجد جي وضو ۽ ٻين حصن کي نقصان پهتو آهي، جڏهن ته ديوارن تي عبراني ۾ اشتعال انگيز نعرا لکيل آهن.
اکين ڏٺن شاهدن موجب باهه لڳڻ سبب مسجد جي ڇت، ڀتيون ۽ فرش سخت متاثر ٿيا. اسرائيلي فوج واقعي جي تصديق ڪندي چيو آهي ته جوابدار واقعي واري هنڌ پهچي فرار ٿي ويا هئا ۽ سندن ڳولا جاري آهي.
اها پيش رفت هڪ اهڙي وقت ۾ سامهون آئي آهي جڏهن فلسطيني علائقن ۾ ڇڪتاڻ جاري آهي ۽ مسجد اقصيٰ جي حيثيت تي بحث هڪ ڀيرو ٻيهر عالمي ڌيان ڇڪائي رهيو آهي.
