ايندڙ مالي سال 27-2026 جي وفاقي بجيٽ ۾ وفاقي حڪومت سولر پينلز تي جي ايس ٽي 10 سيڪڙو مان وڌائي 18 سيڪڙو ڪرڻ ۽ اليڪٽرڪ ۽ هائبرڊ گاڏين تي جنرل سيلز ٽيڪس 1 سيڪڙو مان وڌائي 18 سيڪڙو ڪرڻ جي تجويز ڏني آهي.
ذريعن جو چوڻ آهي ته ايندڙ مالي سال جي وفاقي بجيٽ ۾ ٽيڪسن ۾ واڌ سبب سولر پينل، اليڪٽرڪ ۽ هائبرڊ گاڏيون وڌيڪ مهانگيون ٿيڻ جو امڪان آهي.
ذريعن جو چوڻ آهي ته عالمي مالياتي فنڊ (آءِ ايم ايف) ڪنهن به قسم جي ٽيڪس استثنيٰ جي مخالفت ڪري رهيو آهي پر ان باوجود حڪومت آءِ ايم ايف کي ماحول دوست توانائي بابت رليف ڏيڻ لاءِ راضي ڪرڻ جي ڪوشش ڪري رهي آهي.
ذريعن جو چوڻ آهي ته هن وقت تائين جي تجويزن موجب ايندڙ مالي سال 27-2026 جي بجيٽ ۾ ٽيڪس جي شرح وڌائڻ جي حوالي سان سولر پينلز، اليڪٽرڪ ۽ هائبرڊ گاڏين جي قيمتن ۾ واڌ جو خدشو آهي.
ذريعن جو وڌيڪ چوڻ آهي ته آءِ ايم ايف اليڪٽرڪ گاڏين تي جنرل سيلز ٽيڪس 1 سيڪڙو مان وڌائي 18 سيڪڙو ڪرڻ ۽ هائبرڊ گاڏين تي ٽيڪس 8 سيڪڙو مان وڌائي 18 سيڪڙو ڪرڻ جي ايگزيڪيوٽو تجويز ڏني آهي.
تجويز ڪيل منصوبي تحت، سولر پينلز تي جي ايس ٽي کي 10 سيڪڙو مان وڌائي 18 سيڪڙو ڪرڻ جي تجويز ڏني وئي آهي، جنهن سان اليڪٽرڪ ڪارن، موٽرسائيڪلن، رڪشا، ٽرڪ ۽ بسن سميت ٻين برقي گاڏين جي قيمتن ۾ واڌ جو امڪان آهي.
اليڪٽرڪ پڪ اپ، ٽريڪٽر ۽ ڊبل ڪيبن گاڏين تي به ٽيڪس وڌائڻ جي تجويز غور هيٺ آهي.
ذريعن جو چوڻ آهي ته ٽيڪسٽائيل شعبي حڪومت کان مطالبو ڪيو آهي ته فوري طور تي 327 ارب رپين جا ريفنڊ جاري ڪيا وڃن.
صنعتڪارن به ٽيڪس، بجلي ۽ گيس جي قيمتن ۾ گهٽتائي جي اپيل ڪئي آهي. امڪاني قدم سان برآمد ڪندڙن کي 100 ارب رپين تائين جو رليف ملڻ جو امڪان آهي. ايڪسپورٽ شعبي لاءِ وڏي رليف پيڪيج جا امڪان اڃا تائين محدود آهن.
