واشنگٽن: آمريڪي سينيٽر برني سينڊرز ڪانگريس ۾ غور هيٺ آيل بل جي مخالفت جو اعلان ڪري ڇڏيو آهي جنهن ۾ هن چيو آهي ته اسرائيل ۽ آمريڪا جي وچ ۾ فوجي تعاون وڌيڪ مضبوط ٿيندو ۽ آمريڪي ٽيڪس ادا ڪندڙن تي اضافي مالي بار وڌندو.
سوشل ميڊيا پليٽ فارم ايڪس تي پنهنجي بيان ۾ برني سينڊرز چيو ته اسرائيلي وزيراعظم بينجمن نيتن ياهو ڄاڻي ٿو ته آمريڪي عوام اسرائيل جي جنگين لاءِ مسلسل مالي مدد فراهم ڪندي ٿڪجي چڪو آهي، تنهن ڪري هو هاڻي ڪانگريس سان گڏجي ڪم ڪري رهيو آهي ته پينٽاگون جي گڏيل پيداواري معاهدي ۾ فوجي امداد شامل ڪئي وڃي.
سينڊرز جي مطابق، تجويز ظاهري طور تي آمريڪي فوجي امداد ۾ گهٽتائي جي طور تي پيش ڪيو پيو وڃي، پر حقيقت ۾ اسرائيل کي وڌيڪ آمريڪي ٽيڪس ادا ڪندڙ فنڊ ڏنا ويندا.
هن واضح ڪيو ته هو ان قدم جي مخالفت ڪندو ۽ ان کي پاس ٿيڻ نه ڏيندو.
اها شق يو ايس نيشنل ڊفينس اٿارائيزيشن ايڪٽ ۾ شامل ڪئي وئي آهي، جنهن تي ڪانگريس ۾ بحث ٿي رهيو آهي.
برني سينڊرز کان علاوه آمريڪي ايوان نمائندگان جي ميمبرن رو کنا ۽ ٿامس ميسي به ان تجويز تي تحفظات جو اظهار ڪيو ۽ ان جي مخالفت ڪئي.
مبصرن موجب اهو معاملو هڪ اهڙي وقت سامهون آيو آهي جڏهن اسرائيل ۽ وچ اوڀر جي پاليسين تي آمريڪي فوجي امداد تي سياسي بحث تيز ٿي رهيو آهي، جڏهن ته ڪيترائي قانون ساز آمريڪي وسيلن جي استعمال ۽ پرڏيهي جنگين ۾ واشنگٽن جي ڪردار تي سوال اٿاري رهيا آهن.
