واشنگٽن (م ڊ) آمريڪي صدر ڊونلڊ ٽرمپ چيو آهي ته هن ايران کي واضح پيغام ڏنو آهي ته هاڻي وقت اچي ويو آهي ته ٻئي ملڪ ڪنهن نه ڪنهن صورت ۾ معاهدي تي پهچي وڃن.
پنهنجي تازي بيان ۾ صدر ٽرمپ چيو ته ايران گذريل 47 سالن کان جيڪو رويو اختيار ڪري رهيو آهي، ان کي جاري رکڻ جي اجازت نه ٿو ڏئي سگهجي. هن چيو ته سفارتي حل ۽ معاهدو موجوده صورتحال ۾ اڳتي وڌڻ جو بهترين رستو آهي.
ڊونلڊ ٽرمپ آمريڪا ۽ ايران وچ ۾ ڳالهين ۾ تعطل جي خبرن کي به رد ڪري ڇڏيو. هن چيو ته ڪجهه رپورٽن جي ابتڙ ٻنهي ملڪن وچ ۾ رابطي ۽ ڳالهين جو سلسلو جاري آهي ۽ ڳالهين جو سلسلو بند ناهي ٿيو.
آمريڪي صدر موجب ايران ۽ آمريڪا وچ ۾ مختلف معاملن تي ڳالهيون جاري آهن پر ڳالهين جو حتمي نتيجو ڇا نڪرندو اهو چوڻ وقت کان اڳڀرائي آهي.
هن وڌيڪ چيو ته هن وقت ڪو به يقين سان نٿو چئي سگهي ته اهي ڳالهيون ڪهڙي طرف وٺنديون يا ڪهڙي قسم جي معاهدي تي صحيحون ٿينديون، پر ٻنهي طرفن ۾ رابطا جاري آهن.
ٽرمپ جو بيان هڪ اهڙي وقت ۾ سامهون آيو آهي جڏهن گذريل ڪجهه هفتن کان آمريڪا ۽ ايران وچ ۾ امڪاني معاهدي، ايٽمي پروگرام، علائقائي ڇڪتاڻ ۽ اقتصادي پابندين بابت مختلف قياس آرائيون جاري آهن.
عالمي مبصرن جون نظرون ٻنهي ملڪن جي وچ ۾ جاري سفارتي لاڳاپن تي به مرکوز آهن ڇو ته ڪنهن به ممڪن پيش رفت جا وچ اوڀر ۽ عالمي سياست تي اهم اثر پئجي سگهن ٿا.
