آمريڪي صدر ڊونلڊ ٽرمپ نائب صدر جي ڊي وينس ۽ سيڪريٽري آف اسٽيٽ مارڪو روبيو کي هدايت ڪئي آهي ته هو ايران سان سفارتي رابطا ۽ ڳالهيون جاري رکن.
آمريڪي ميڊيا رپورٽن موجب ٽرمپ جي انهن هدايتن جو مقصد ايران سان ڇڪتاڻ کي قابو ۾ رکندي ايٽمي پروگرام، علائقائي سلامتي ۽ ٻين تڪراري معاملن تي ڳالهين جو سلسلو جاري رکڻ آهي.
ماهرن موجب ٽرمپ جي هدايتن مان ظاهر ٿئي ٿو ته واشنگٽن هڪ طرف ايران تي دٻاءُ برقرار رکڻ چاهي ٿو ته ٻئي طرف سفارتي چينل به کليل رکڻ چاهي ٿو.
اها پيش رفت هڪ اهڙي وقت ۾ سامهون آئي آهي جڏهن آمريڪا ۽ ايران وچ ۾ گذريل ڪجهه ڏينهن کان سخت بيانن ۽ حملن جو سلسلو جاري آهي پر ان جي باوجود ٻنهي ملڪن وچ ۾ اڻ سڌي طرح سفارتي رابطن جون خبرون سامهون آيون آهن.
تجزيه نگارن موجب ٽرمپ جو جي ڊي وينس ۽ مارڪو روبيو کي ڳالهين جاري رکڻ جي هدايت ان ڳالهه جي نشاني آهي ته آمريڪي انتظاميه فوجي دٻاءُ ۽ سفارتڪاري ٻنهي کي هڪ ئي وقت استعمال ڪرڻ جي حڪمت عملي تي عمل ڪري رهي آهي.
بهرحال، ڪنهن به ممڪن معاهدو يا پيش رفت مستقبل جي ڳالهين جي نتيجي تي منحصر هوندو.
