امير جماعت اسلامي حافظ نعيم الرحمان 19 جولاءِ تي پاڪستان جي يوم الحاق جي موقعي تي پنهنجي پيغام ۾ چيو آهي ته پاڪستاني قوم ڪشميري عوام جي اصولي حمايت تي قائم آهي.
حافظ نعيم الرحمان چيو ته پاڪستان سان الحاق جو ٺهراءُ 19 جولاءِ 1947ع تي سرينگر ۾ سردار ابراهيم خان جي گهر ۾ ٿيل اجلاس ۾ پاس ڪيو ويو، جنهن ۾ سرينگر، ڄمون ۽ مظفرآباد کان ميرپور تائين رياست جي هر علائقي مان نمائندن شرڪت ڪئي.
هن چيو ته ڪشميري قوم ماضي وانگر اڄ به متحد آهي ۽ آزادي جي جدوجهد جاري رکي رهي آهي. هن چيو ته پاڪستاني قوم ڪشميري عوام جي اصولي حمايت ۾ ثابت قدم آهي ۽ هر ڏکئي وقت ۾ انهن سان گڏ بيٺل آهي.
حافظ نعيم الرحمان قائداعظم محمد علي جناح جو حوالو ڏيندي چيو ته ڪشمير پاڪستان جي شريان آهي، جڏهن ته والاريل ڄمون ۽ ڪشمير جو هر نوجوان آزادي لاءِ قربانيون ڏئي رهيو آهي.
هن چيو ته پاڪستاني عوام هميشه ڪشميري ڀائرن جو ساٿ ڏنو آهي، جڏهن ته عظيم ڪشميري اڳواڻ سيد علي گيلاني جو نعرو ”اسان پاڪستاني، پاڪستان اسان جو“ سڄي ڪشميري قوم جو آواز آهي.
امير جماعت اسلامي ڄمون ۽ ڪشمير ۾ ڀارت جي غيرقانوني حڪمراني تحت انساني حقن جي سنگين ڀڃڪڙين جي مذمت ڪندي چيو آهي ته ڪشميرين جي جدوجهد ضرور رنگ لاهيندي ۽ ڪشمير جا سمورا يونٽ پاڪستان جو حصو بڻجندا.
