پاڪستاني ڄائي برطانوي باڪسر حمزه شيراز عالمي چيمپيئن بڻجي راندين جي دنيا ۾ هڪ ڀيرو ٻيهر پاڪستان جو جهنڊو بلند ڪري ڇڏيو آهي.
تفصيل موجب پاڪستاني نژاد برطانوي باڪسر حمزه شيراز ڊبليو بي او سپر مڊل ويٽ ورلڊ ٽائيٽل کٽي ورتو.
حمزه شيراز جرمني جي ايلام بيگيچ کي ٻئي رائونڊ ۾ شڪست ڏئي پهريون ڀيرو عالمي چيمپيئن بڻجي ويو.
حمزه شيراز فائٽ جي شروعات کان ئي جارحاڻي حڪمت عملي اختيار ڪئي، سندس جيبس ۽ درست پنچز جرمن مخالف کي بي وس ڪري ڇڏيو.
حمزه شيراز جي خطرناڪ ليفٽ ٿڪ جي نتيجي ۾ جرمن باڪسر رِنگ ۾ بيهي نه سگهيو، ريفري فوري طور تي فائٽ روڪي ڇڏي.
26 سالن جي حمزه شيراز رٽائرڊ ٽرينس ڪرافورڊ طرفان خالي ڪيل WBO سپر مڊل ويٽ بيلٽ کٽي تاريخ رقم ڪئي.
فتح کانپوءِ پاڪستاني ڄائي برطانوي باڪسر حمزه شيراز رنگ ۾ سجدو ڪري ٽيم سان گڏ فتح جو جشن ملهايو.
پنهنجي عظيم فتح جي موقعي تي ميڊيا سان ڳالهائيندي حمزه شيراز چيو ته ان ڪاميابي کانپوءِ هاڻي 168 پائونڊن جي ڪيٽيگري ۾ عالمي باڪسرز کي منهن ڏيڻ لاءِ مڪمل طور تي تيار آهيان.
هن چيو ته اها ميچ منهنجي لاءِ تمام آسان هئي، پهرين پنچ لڳڻ سان ئي مخالف مڪمل دٻاءُ ۾ اچي ويو، مون مسلسل دٻاءُ ۾ رکي کيس شڪست ڏني.
حمزه شيراز سيپٽمبر 2024ع ۾ ٽائلر ڊيني کي شڪست ڏئي يورپين مڊل ويٽ ٽائيٽل به کٽي چڪو آهي.
پاڪستاني سوشل ميڊيا صارفين ۽ راندين جي مداحن حمزه شيراز جي تاريخي ڪاميابي کي پاڪستان لاءِ فخر جو باعث قرار ڏنو.
