پاڪستان ڪرڪيٽ ٽيم جي مشهور ۽ پرجوش حامي ”چاچا ڪرڪيٽ“ هن سال ريٽائرمينٽ جو اعلان ڪري ڇڏيو آهي.
چاچا ڪرڪيٽ جي نالي سان مشهور 77 سالن جو عبدالجليل لاهور ۾ پاڪستان ۽ آسٽريليا وچ ۾ ٽيون ون ڊي ميچ آخري ڀيرو پنهنجي ملڪ ۾ ڏسندو.
چاچا پهريون ڀيرو 1968-69ع ۾ لاهور جي اسٽيڊيم ۾ انگلينڊ خلاف ٽيسٽ ميچ دوران ڪرڪيٽ کي ڏٺو.
بعد ۾ هو شارجه ڪرڪيٽ اسٽيڊيم ۾ پاڪستاني ٽيم جي مسلسل سپورٽر طور مشهور ٿيو.
سائو لباس ۽ ٽوپي سندس نشاني بڻجي وئي، جڏهن ته هن 1999ع جي ورلڊ ڪپ دوران انگلينڊ ۾ پاڪستاني ٽيم کي سپورٽ ڪرڻ بعد عالمي شهرت حاصل ڪئي.
عبدالجليل جو چوڻ هو ته هاڻي هو سيالڪوٽ ڀرسان هڪ ريسٽورنٽ ۽ ميوزيم قائم ڪرڻ چاهي ٿو جتي هو پنهنجي ڪرڪيٽ جون يادگار شيون رکي ڇڏيندو.
هن چيو ته هن پاڪستان جي 500 ميچن ۾ ٽيم کي حوصلا افزائي جو ٽارگيٽ پورو ڪيو آهي.
چاچا ڪرڪيٽ پاڪستان جي ڪيترن ئي تاريخي فتوحات جي شاهدي ڏني، جن ۾ 1986 ۾ جاويد ميانداد جي آخري بال تي ڇڪو ۽ 2017 جي چيمپئنز ٽرافي فائنل شامل آهن.
هوڏانهن گذريل ڪجهه سالن ۾ قومي ٽيم جي خراب ڪارڪردگيءَ تي به کيس مايوسي نظر آئي، پر پوءِ به اميد آهي ته پاڪستاني ٽيم ٻيهر ڪاميابيءَ جي راهه تي گامزن ٿيندي.
