اسلام آباد:
پاڪستان سميت سڄي دنيا ۾ اڄ مزدورن جو ڏهاڙو ملهايو پيو وڃي، پورهيت طبقي جي خدمتن کي خراج عقيدت پيش ڪرڻ ۽ انهن جي حقن جي تحفظ جي عزم جي تجديد ڪرڻ لاءِ اڄ مزدورن جو عالمي ڏينهن ملهايو پيو وڃي.
1 مئي تي ملهايو ويندو آهي، هي ڏينهن معاشي ترقي ۾ مزدورن جي جدوجهد، قربانين ۽ اهم ڪردار جي ياد ۾ ملهايو ويندو آهي.
ملڪ جي مختلف شهرن ۾ سرڪاري توڙي خانگي تقريبون، ريليون ۽ سيمينار منعقد ڪيا پيا وڃن، جن ۾ مزدورن جي حقن، بهتر اجرت، محفوظ ڪم ڪندڙ ماحول ۽ سماجي تحفظ جهڙن اهم موضوعن کي اجاگر ڪيو پيو وڃي.
ٻئي طرف مهانگائي، بيروزگاري ۽ گهٽ اجرت جا مسئلا اڄ به پورهيت طبقي لاءِ هڪ وڏو چئلينج آهن. مزدورن جي عالمي ڏهاڙي جي موقعي تي به مزدورن جو وڏو انگ روزگار جي تلاش ۾ مصروف نظر اچي ٿو، جڏهن ته ڪيترائي ماڻهو پنهنجي روزاني ذميوارين کي پورو ڪرڻ لاءِ ڪم تي ويٺا آهن.
مزدورن جي عالمي ڏهاڙي جي موقعي تي پنهنجي پيغام ۾ وزيراعظم شهباز شريف چيو ته پورهيت طبقو ملڪي معيشت جي ريڙهه جي هڏي آهي. هن چيو ته پورهيت ۽ ماهر ماڻهو پنهنجي محنت، قابليت ۽ پيشيوراڻي صلاحيتن سان نه رڳو ملڪ اندر پر ٻاهرين ملڪن ۾ به پاڪستان جو نالو روشن ڪري رهيا آهن.
وزيراعظم پنهنجي ان عزم کي ورجايو ته حڪومت مزدورن جي حقن جي تحفظ، انهن جي ڀلائي ۽ روزگار جا بهتر موقعا فراهم ڪرڻ لاءِ قدم کڻندي رهندي. هن چيو ته اڄ اسان کي اهو عهد ڪرڻو آهي ته اسان سڀ گڏجي هڪ اهڙو سماج ٺاهڻ ۾ پنهنجو ڪردار ادا ڪنداسين جتي مزدور کي ان جو جائز حق ۽ عزت ملي.
