سينٽ پيٽرزبرگ: روسي صدر ولاديمير پيوٽن سينٽ پيٽرزبرگ انٽرنيشنل اڪنامڪ فورم دوران پاڪستان بابت ڀارتي صحافي جي سوال جو جواب ڏيندي واضح ڪيو ته پاڪستان کي چين جي اثر هيٺ ملڪ چوڻ درست ناهي.
فورم دوران هڪ ڀارتي صحافي پاڪستان ۽ چين جي لاڳاپن بابت سوال ڪيو جنهن تي صدر پيوٽن چيو ته اهو تاثر غلط آهي ته پاڪستان مڪمل طور تي چين جي اثر هيٺ آهي. هن ان ڳالهه تي زور ڏنو ته پاڪستان هڪ وڏو ۽ اهم ملڪ آهي جنهن جا دنيا جي مختلف ملڪن سان متوازن ۽ متنوع لاڳاپا آهن.
روسي صدر وڌيڪ چيو ته روس ۽ چين وچ ۾ دفاعي ۽ فوجي تعاون ڪافي عرصي کان هلي رهيو آهي ۽ اهو تعاون مستقبل ۾ به جاري رهندو. هن چيو ته ماسڪو ۽ بيجنگ جا لاڳاپا گڏيل مفادن ۽ اسٽريٽجڪ پارٽنرشپ تي ٻڌل آهن.
ايران بابت هڪ سوال جي جواب ۾ ولاديمير پيوٽن چيو ته روس جا ايران سان اعتماد تي ٻڌل لاڳاپا آهن ۽ ماسڪو خطي ۾ جاري ڇڪتاڻ جي حل لاءِ مثبت ڪردار ادا ڪري سگهي ٿو.
روسي صدر پيوٽن هڪ پاڪستاني جنوني ڀارتي صحافي کي ليڪچر ڏيندي چيو ته ”مان نٿو سمجهان ته پاڪستان اهڙو ملڪ آهي جيڪو مڪمل طور تي چين جي قبضي هيٺ آهي، پاڪستان هڪ وڏو ملڪ آهي ۽ ان جا مختلف ملڪن سان گهڻ رخا لاڳاپا آهن“. https://t.co/kg9sYpvHdi
حامد مير (@HamidMirPAK) جون 5، 2026
يوڪرين جنگ تي ڳالهائيندي هن دعويٰ ڪئي ته روسي فورسز تازو ئي يوڪرين جي 2440 چورس ڪلوميٽرن تي ڪنٽرول حاصل ڪري ورتو آهي. بهرحال، هن اهو به ورجايو ته روس يوڪرين سان تڪرار جي پرامن حل لاءِ ڳالهين جو رستو اختيار ڪرڻ لاءِ تيار آهي.
صدر پيوٽن جي بيان کي پاڪستان جي طرف اهم سفارتي اشارو قرار ڏنو پيو وڃي، جنهن ۾ هن پاڪستان جي آزاد پرڏيهي پاليسي ۽ عالمي لاڳاپن کي تسليم ڪيو.
