ڪراچي:
پاڪستان عالمي ڪسٽم آرگنائيزيشن جي پاليسي ڪميشن جي اليڪشن 2026-28 جي عرصي لاءِ عالمي سطح تي وڏي سفارتي ۽ اداري ڪاميابي حاصل ڪري ورتي آهي.
70 سالن جي ميمبرشپ ۾ هي پهريون ڀيرو آهي جو پاڪستان کي هن اعليٰ ترين پاليسي فورم ۾ نمائندگي ملي رهي آهي، جنهن کي عالمي ڪسٽم سسٽم ۾ هڪ غير معمولي ترقي قرار ڏنو پيو وڃي.
اها چونڊ 18 مئي کان 20 مئي 2026 تائين هانگ ڪانگ ۾ منعقد ٿيندڙ ايشيا پيسفڪ ريجنل هيڊس آف ڪسٽم ايڊمنسٽريشنز جي اجلاس دوران ٿي، جتي سخت مقابلي کانپوءِ پاڪستان پنجن سيٽن لاءِ ڇهن اميدوارن مان پنهنجي جاءِ ٺاهي ورتي.
نامزدگي جون 2026 ۾ WCO ڪائونسل جي اجلاس ۾ باضابطه طور تي منظور ڪئي ويندي. پاليسي ڪميشن ورلڊ ڪسٽم آرگنائيزيشن جو مکيه اسٽريٽجڪ پليٽ فارم آهي، جتي ڪسٽم جي جديديت، واپار جي سهولت، ڊجيٽل تبديلي ۽ گلوبل گورننس بابت پاليسي فيصلا ڪيا ويندا آهن.
فورم ۾ شامل ٿيڻ سان پاڪستان کي عالمي سطح تي موثر آواز ملندو. گذريل ٻن سالن ۾ فعال ڪسٽم ڊپلوميسي، علائقائي رابطا ۽ ادارتي سڌارا پاڪستان جي ڪاميابي جا اهم عنصر هئا. برسلز ۾ پاڪستان ڪسٽمز جي مستقل مشن جي قيام پڻ عالمي فورمن تي پاڪستان جي موجودگي کي مضبوط ڪيو.
