ايف آءِ ايڇ هاڪي پرو ليگ ۾ پاڪستان هاڪي ٽيم جون مشڪلاتون ختم نه ٿي سگهيون ۽ کيس اسپين هٿان 2-4 تان شڪست جو منهن ڏسڻو پيو. ان شڪست سان قومي ٽيم ايونٽ ۾ مسلسل 12هين ميچ هارائي وئي. بيلجيم ۾ کيڏيل ميچ ۾ اسپين پنهنجي ڪيترن ئي اهم ۽ تجربيڪار رانديگرن کي آرام ڏنو ۽ نوجوان رانديگرن کي موقعو ڏنو پر پاڪستان ان صورتحال مان فائدو کڻڻ ۾ ناڪام رهيو. ميچ جي پهرين ڪوارٽر ۾ ٻئي ٽيمون ڪو به گول نه ڪري سگهيون. ان دوران اسپين کي برتري حاصل ڪرڻ جو بهترين موقعو مليو پر پاڪستان جي گول ڪيپر علي رضا شاندار انداز ۾ پنالٽي اسٽروڪ کي بچائيندي ٽيم کي خساري کان بچائي ورتو. پاڪستان 28هين منٽ ۾ برتري حاصل ڪري ورتي جڏهن ابوبڪر محمود خوبصورت گول ڪري گول ڪيو پر اها خوشي ٿوري وقت لاءِ رهي ۽ ايندڙ ئي منٽ ۾ اسپين جي پيپ ڪينل گول ڪري ميچ 1-1 جي برابر ڪري ڇڏي. پهريون هاف ساڳئي اسڪور سان ختم ٿيو، پر ٽئين ڪوارٽر ۾ اسپين جارحاڻي انداز ۾ راند کيڏي ۽ وڌيڪ ٻه گول ڪري اسڪور 1-3 ڪري ڇڏيو. ڪوارٽر جي آخري لمحن ۾ ابوبڪر محمود پنهنجو ٻيو گول ڪري پاڪستان جي اميدن کي زنده رکيو ۽ خساري کي 2-3 تان گهٽائي ڇڏيو. چوٿين ۽ آخري ڪوارٽر ۾ اسپين هڪ ٻيو گول ڪري برتري مضبوط ڪري ميچ 2-4 تان پنهنجي نالي ڪري ورتي. مسلسل شڪستن سبب پاڪستان جي پوزيشن وڌيڪ ڪمزور ٿي وئي آهي، ٽيم کي دفاعي ۽ فنشنگ جي شعبن ۾ بهتري جي ضرورت آهي. پاڪستان هاڪي ٽيم هاڻي ايف آءِ ايڇ پرو ليگ جي فائنل اسٽيج لاءِ انگلينڊ روانو ٿيندي، جتي سندس اهم ميچ 23 جون تي روايتي حریف ڀارت خلاف کيڏي ويندي.
Source link
Leave a Comment Leave a Comment
