لاهور:
پنجاب ڪابينا جي اجلاس ۾ وڏي وزير مريم نواز نئين مالي سال جي بجيٽ پيش ڪرڻ جي منظوري ڏني.
پنجاب جي وڏي وزير مريم نواز شريف جي صدارت هيٺ پنجاب ڪابينا جو اهم اجلاس ٿيو، جنهن ۾ نئين مالي سال جي بجيٽ بابت مختلف معاملن تي غور ڪيو ويو. اجلاس ۾ ايندڙ مالي سال جي مالي هدفن ۽ بجيٽ تجويزن تي تفصيلي غور ويچار ڪيو ويو.
ذريعن موجب ڪابينا اجلاس ۾ بجيٽ ۾ شامل مختلف تجويزن جو جائزو ورتو ويو، جڏهن ته سرڪاري ملازمن جي پگهارن ۽ پينشن بابت به تجويزون غور هيٺ هيون. اجلاس ۾ شرڪت ڪندڙن بجيٽ جي مختلف شقن ۽ ان جي ممڪن اثرن تي خيالن جي ڏي وٺ ڪئي.
ذريعن جو چوڻ آهي ته پنجاب جي وڏي وزير مريم نواز شريف ڪابينا اجلاس ۾ ايندڙ مالي سال جي بجيٽ پيش ڪرڻ جي منظوري ڏئي ڇڏي آهي، جنهن کانپوءِ پنجاب اسيمبلي ۾ بجيٽ پيش ڪرڻ جو رستو هموار ٿي ويو آهي.
ٻئي طرف پنجاب جي وڏي وزير جي صدارت هيٺ مسلم ليگ (ن) جي پارلياماني پارٽي جو اجلاس به ٿيو، جنهن ۾ اسيمبلي ميمبرن کي پنجاب اسيمبلي جي بجيٽ اجلاس ۾ وڏي انگ ۾ شرڪت جي هدايت ڪئي وئي.
ذريعن موجب پنجاب اسيمبلي جي بجيٽ اجلاس ۾ پنجاب جي وڏي وزير مريم نواز شريف جي شرڪت جو به امڪان آهي.
