اسلام آباد:
وفاقي حڪومت پاڪستان انٽرنيشنل ايئر لائنز (پي آءِ اي) جي رٽائرڊ ملازمن جي ميڊيڪل ۽ پينشن جي ادائيگي لاءِ 4.4 ارب رپين جي منظوري ڏئي ڇڏي آهي، جڏهن ته پراڻين گاڏين جي مرمت کانپوءِ ايڪسپورٽ لاءِ درآمد جي نئين پاليسي جي به منظوري ڏني وئي آهي.
اهي فيصلا ناڻي واري وزير محمد اورنگزيب جي صدارت هيٺ اقتصادي رابطا ڪميٽي (اي سي سي) جي اجلاس ۾ ڪيا ويا. ناڻي واري وزارت موجب پي آءِ اي هولڊنگ ڪمپني لميٽيڊ جي مجموعي طور 6 ارب رپين جي درخواست تي غور ڪيو ويو، جنهن مان 4.4 ارب رپيا ميڊيڪل ۽ پينشن جي ادائيگين جي منظوري ڏني وئي.
اي سي سي پريزين انجنيئرنگ ڪمپليڪس جي ملازمن جي پگهارن لاءِ 45.5 ملين رپين جي به منظوري ڏني پر پي آءِ اي سي ايل لاءِ 1.1 ارب رپين جي اضافي رقم جي منظوري ملتوي ڪري ڇڏي.
اجلاس ۾ مهانگائي جي رجحان تي به بريفنگ ڏني وئي، جنهن ۾ حڪومتي موقف موجب قيمتون مستحڪم ٿي رهيون آهن، پر ان جي ابتڙ اسٽيٽ بئنڪ مهانگائي جو خدشو ظاهر ڪندي شرح سود هڪ سيڪڙو وڌائي 11.5 سيڪڙو ڪري ڇڏي آهي.
اي سي سي بلوچستان جي آفيسرن لاءِ 31.1 ملين رپيا حوصلي واري پيڪيج، نيب جي ڊيجيٽلائيزيشن لاءِ 37.2 ملين رپيا ۽ قومي هاڪي ٽيم لاءِ 3 ڪروڙ رپيا پڻ منظور ڪيا.
ان کان علاوه جبري مشقت ذريعي تيار ڪيل سامان جي درآمد تي پابندي جي پائلٽ پاليسي جڏهن ته عارضي طور استعمال ٿيل گاڏيون ۽ اسپيئر پارٽس درآمد ڪرڻ ۽ مرمت کانپوءِ برآمد ڪرڻ جي پڻ منظوري ڏني وئي.
ان پاليسي تحت اهڙيون گاڏيون ملڪ اندر وڪرو نه ٿي سگهنديون. اجلاس ۾ گوادر جي گدڙن جي ذبح خاني مان گڏهه جي گوشت ۽ لڪ جي برآمد بابت تجويزن جي به منظوري ڏني وئي.
