پي ڊي ايم اي پنجاب صوبي ۾ 7 کان 11 مئي تائين هيٽ ويو الرٽ جاري ڪري ڇڏيو آهي، پي ڊي ايم اي ترجمان موجب اپر پنجاب ۾ گرمي پد 39 کان 43 ڊگري سينٽي گريڊ تائين وڃڻ جو امڪان آهي. لاهور، راولپنڊي، اٽڪ، جهلم، چکوال، سرگوڌا، ميانوالي، فيصل آباد، جهنگ، ٽوبا ٽيڪ سنگهه، خوشاب، گجرات، گوجرانوالا، حافظ آباد، منڊي بهاءُ الدين، سيالڪوٽ، نارووال ۽ قصور ۾ گرمي پد ۾ اضافي جي اڳڪٿي ڪئي وئي آهي. ڏکڻ پنجاب ۾ گرمي جي شدت وڌيڪ وڌڻ جو امڪان آهي، جتي گرمي پد 43 کان 47 ڊگري سينٽي گريڊ تائين وڃي سگهي ٿو. ڊيرا غازي خان، ليه، ڀکر، راجن پور، ڪوٽ ادو، بهاولپور، بهاول نگر، رحيم يار خان ۽ خانيوال ۾ به سخت گرمي جو امڪان آهي. رليف ڪمشنر پنجاب نبيل جاويد سمورن ڪمشنرن ۽ ڊپٽي ڪمشنرن کي الرٽ رهڻ ۽ ضروري انتظام مڪمل ڪرڻ جي هدايت ڪئي آهي. ڊي جي پي ڊي ايم اي موجب رات جي وقت به گرمي پد معمول کان مٿي رهڻ جو امڪان آهي، جڏهن ته مٽيءَ جي هوائن ۽ طوفان جو به خطرو آهي. پي ڊي ايم اي پنجاب شهرين خاص ڪري ٻارن، عورتن ۽ بزرگن کي احتياطي تدبيرون اختيار ڪرڻ جي هدايت ڪئي آهي. سج ۾ غير ضروري حرڪت کان پاسو ڪرڻ ۽ ڪافي پاڻي پيئڻ تي زور ڏنو ويو آهي. هارين کي فصلن ۽ چوپائي مال جي حفاظت لاءِ احتياطي اپاءَ وٺڻ جي هدايت ڪئي وئي آهي. ريسڪيو 1122 کي هيٽ اسٽروڪ ۽ ڊي هائيڊريشن ۾ مبتلا ماڻهن کي فوري امداد فراهم ڪرڻ لاءِ الرٽ رهڻ جو حڪم ڏنو ويو آهي. شهري علائقن ۾ رليف ڪئمپون قائم ڪيون ويون آهن جتي صاف پاڻي، او آر ايس ۽ فرسٽ ايڊ جون سهولتون فراهم ڪيون وينديون. ان کان علاوه هيٽ اسٽروڪ ۽ ڊي هائيڊريشن جي ڪيسن کي بروقت منهن ڏيڻ لاءِ موبائيل هيلٿ ٽيمن کي به متحرڪ ڪيو ويندو. پي ڊي ايم اي موجب سخت گرمي سبب اترين علائقن ۾ برف پگھلڻ جي رفتار ۾ به اضافو ٿي سگهي ٿو، جنهن کي نظر ۾ رکندي لاڳاپيل ادارن کي الرٽ رهڻ جي هدايت ڪئي وئي آهي.
Source link
Leave a Comment Leave a Comment
