وفاقي بجيٽ 2026-2027 تي سڄي ملڪ جي واپاري ۽ صنعتي تنظيمن حڪومت تي اعتماد جو اظهار ڪندي ان کي معيشت جي استحڪام، سيڙپڪاري جي فروغ ۽ ڪاروباري سرگرمين ۾ واڌ جي حوالي سان مثبت پيش رفت قرار ڏنو آهي.
واپاري تنظيمن به وزيراعظم شهباز شريف، نائب وزيراعظم اسحاق ڊار، ناڻي واري وزير سينيٽر محمد اورنگزيب ۽ اقتصادي ٽيم کي عوام دوست بجيٽ پيش ڪرڻ تي مبارڪباد ڏني آهي.
فيڊريشن آف پاڪستان چيمبرز آف ڪامرس اينڊ انڊسٽري، اوورسيز انويسٽرز چيمبر آف ڪامرس، راولپنڊي چيمبر آف ڪامرس، پاڪستان بزنس ڪائونسل ۽ پاڪستان بئنڪس ايسوسي ايشن سميت مختلف ڪاروباري تنظيمن وفاقي بجيٽ 2026-2027 جي آجيان ڪئي آهي ۽ ان کي ملڪي معيشت لاءِ حوصلا افزائي قرار ڏنو آهي.
فيڊريشن آف پاڪستان چيمبرز آف ڪامرس اينڊ انڊسٽري جو چوڻ آهي ته بجيٽ ملڪي معيشت جي استحڪام، سيڙپڪاري جي فروغ ۽ ڪاروباري سرگرمين ۾ واڌ لاءِ مثبت قدم آهي. فيڊريشن ان عزم جو اظهار ڪيو ته واپاري برادري حڪومت سان سهڪار جاري رکندي معاشي ترقي ۽ سيڙپڪاري کي هٿي وٺرائڻ ۾ پنهنجو ڪردار ادا ڪندي رهندي.
اوورسيز انويسٽرز چيمبر آف ڪامرس اينڊ انڊسٽري بجيٽ ۾ پگهاردار طبقي ۽ ڪاروباري شعبي لاءِ امدادي قدمن جي آجيان ڪئي ۽ اوورسيز سپر ٽيڪس ۾ گهٽتائي ۽ ايڪسپورٽ سيڪٽر لاءِ مراعات کي سيڙپڪاري لاءِ مثبت نشاني قرار ڏنو.
راولپنڊي چيمبر آف ڪامرس اينڊ انڊسٽري پگهاردار طبقي تي سرچارج جي خاتمي ۽ انڪم ٽيڪس ۾ گهٽتائي کي وچولي طبقي لاءِ اهم رليف قرار ڏيندي چيو ته اهڙن قدمن سان ڪاروباري ماحول بهتر ٿيندو ۽ معاشي سرگرميون تيز ٿينديون.
پاڪستان بزنس ڪائونسل بهترين بجيٽ پيش ڪرڻ تي حڪومت جي اقتصادي ٽيم کي مبارڪباد ڏيندي چيو ته بجيٽ ۾ جامع ۽ پائيدار ترقي کي حڪومت جي ترجيح قرار ڏنو ويو آهي جڏهن ته مختلف شعبن لاءِ رکيل رليف قدم واپاري برادري ۽ پگهاردار طبقي ٻنهي لاءِ فائديمند ثابت ٿيندا.
پاڪستان بئنڪس ايسوسي ايشن به ڪيترن سالن کان پوءِ جي بجيٽ کي هڪ مالي منصوبو قرار ڏنو آهي جيڪو بحران مان نڪرڻ جي واضح هدفن تي ڌيان ڏئي ٿو.
ايسوسيئيشن موجب حڪومت مالياتي نظم و ضبط برقرار رکندي ترقي ۽ رليف جي وچ ۾ متوازن حڪمت عملي اختيار ڪئي آهي، جڏهن ته بينڪنگ سيڪٽر معاشي بحالي، نجي سيڙپڪاري جي فروغ ۽ معاشي ترقي ۾ پنهنجو ڪردار ادا ڪندو رهندو.
