اسلام آباد:
سي پي پي اي پاران نيپرا کي بجلي جي يونٽن جي قيمتن ۾ واڌ جي درخواست جمع ڪرائي وئي آهي.
ايڪسپريس نيوز موجب بجلي جي قيمت ۾ 26 پئسا في يونٽ واڌ جو امڪان آهي. اهو واڌارو مارچ مهيني جي فيول ايڊجسٽمينٽ جي حصي طور طلب ڪيو ويو آهي.
ان حوالي سان نيشنل اليڪٽرڪ پاور ريگيوليٽري اٿارٽي (نيپرا) 28 اپريل تي سي پي پي اي طرفان داخل درخواست جي ٻڌڻي ڪندو، جنهن ۾ قيمتن ۾ ممڪنه واڌ جي درخواست جو جائزو ورتو ويندو.
سي پي پي اي موجب مارچ دوران 8 ارب 93 ڪروڙ 9 لک يونٽ بجلي پيدا ڪئي وئي. ڊسڪوز کي 8 ارب 644 ملين يونٽ بجلي فراهم ڪئي وئي جڏهن ته مارچ لاءِ ريفرنس لاڳت 7.99 رپيا في يونٽ مقرر ڪئي وئي.
ڊيٽا موجب بجلي جي پيداوار ۾ مختلف ذريعن جو حصو شامل هو، جنهن ۾ 23.55 سيڪڙو بجلي پاڻي مان، 16.76 سيڪڙو مقامي ڪوئلي مان پيدا ڪئي وئي. اهڙي طرح 13.80 سيڪڙو بجلي درآمد ٿيل ڪوئلي مان ۽ 5.64 سيڪڙو درآمد ٿيل ايل اين جي مان پيدا ڪئي وئي.
سي پي پي اي موجب 1.02 سيڪڙو بجلي فرنس آئل مان ۽ 11.34 سيڪڙو ملڪي گئس مان پيدا ڪئي وئي، جڏهن ته مارچ ۾ ائٽمي فيول مان 21.95 سيڪڙو بجلي پيدا ڪئي وئي. ان کان علاوه 3.46 سيڪڙو بجلي ونڊ ۽ 1.18 سيڪڙو شمسي توانائي مان پيدا ڪئي وئي.
درخواست ۾ چيو ويو آهي ته بجلي جي اگهن ۾ تجويز ڪيل واڌ ڪي اليڪٽرڪ تي به لاڳو ٿيندي، جنهن سان اڳ ئي مهانگائي جو شڪار صارفين تي اضافي مالي بار پوڻ جو خدشو آهي.
