بالي ووڊ جي مشهور اداڪارا ڪرينا ڪپور خان پنهنجي پٽ تيمور علي خان سان ڪرڪيٽ کيڏندي هڪ دلچسپ پوسٽ شيئر ڪئي آهي جنهن مداحن کي حيران ڪري ڇڏيو. اداڪارا پنهنجي بالنگ جي صلاحيتن جو مظاهرو ڪيو ۽ ڀارتي فاسٽ بالر جسپريت بمرا کي هلڪي انداز ۾ چيلينج ڪيو.
ڪرينا ڪپور پنهنجي انسٽاگرام تي هڪ تصوير شيئر ڪئي جنهن ۾ هوءَ پنهنجي وڏي پٽ تيمور سان ڪرڪيٽ کيڏندي نظر اچي رهي آهي. تصويرن ۾ اداڪارا بالنگ ڪري رهي آهي جڏهن ته تيمور بيٽسمين طور ڪريز تي موجود آهي.
ان دلچسپ لمحي کي اڃا به خاص بڻائيندي ڪرينا مزاحيه انداز ۾ تصوير جي ڪيپشن ۾ لکيو ته ”منهنجي ٽيلينٽ کي گهٽ نه سمجهو، مان بمراه کي به شاٽ ڏئي سگهان ٿي“ ۽ ان سان گڏ جسپريت بمرا کي ٽيگ ڪيو.
ڪرينا ڪپور جي ان پوسٽ کي مداحن به تمام گهڻو پسند ڪيو ڇو ته اداڪارا اڪثر ڪري پنهنجي نجي زندگي، ٻارن سان گڏ گذاريل لمحن ۽ روزاني سرگرمين جون تصويرون سوشل ميڊيا تي شيئر ڪندي رهندي آهي. هن ڀيري سندس اسپورٽي انداز کي ڏسي مداحن دلچسپ تبصرا ڪيا.
واضح رهي ته تيمور علي خان کي ڪرڪيٽ سان خاص دلچسپي آهي. ڪرينا ڪپور ماضي ۾ اهو به ٻڌايو آهي ته سندس پٽ فلمن کان وڌيڪ راندين خاص ڪري ڪرڪيٽ ۾ دلچسپي رکي ٿو ۽ ڀارتي ڪرڪيٽرن کان به متاثر آهي.
ٻئي طرف جسپريت بمرا دنيا جي بهترين فاسٽ بالرن مان هڪ آهي. هو پنهنجي خطرناڪ يارڪرز، منفرد بالنگ ايڪشن ۽ پريشر لمحن ۾ شاندار ڪارڪردگي سبب ڀارتي ڪرڪيٽ ٽيم جي اهم رانديگرن مان هڪ آهي.
ڪرينا ڪپور خان پنهنجي ايندڙ فلم ”ديرا“ جي تيارين ۾ مصروف آهي، جنهن جي هدايتڪاري مشهور فلمساز ميگهنا گلزار ڪري رهي آهي. فلم ۾ ڪرينا سان گڏ پرٿوي راج سيڪمارن به مرڪزي ڪردار ۾ نظر ايندو ۽ فلم هن سال سينما گهرن جي زينت بڻجندي.
