ڪنهن به آپريشن کان اڳ ايڊز جي اسڪريننگ کي لازمي بڻائڻ جو فيصلو

صحت واري وفاقي وزير مصطفيٰ ڪمال چيو آهي ته ايڇ آءِ وي سان لاڳاپيل ڪنهن به آپريشن کان اڳ ايڊز جي اسڪريننگ کي لازمي بڻائڻ جو فيصلو ڪيو ويو آهي. قومي اسيمبلي جي اسٽينڊنگ ڪميٽي جو اجلاس قومي صحت بابت اسٽينڊنگ ڪميٽي جي ميمبر مهيش ڪمار ملاني جي صدارت هيٺ ٿيو، جنهن ۾ صحت واري وزارت جي عملدارن چيو ته صحت واري وزير کي درخواست ڪئي آهي ته ايڊز بابت بريفنگ ان ڪئميرا ڪئي وڃي، جڏهن ته ميمبرن ان ڪئميرا بريفنگ جي مخالفت ڪئي. صحت واري وزارت جي عملدارن بريفنگ ۾ ٻڌايو ته سڄي ملڪ ۾ ايڇ آءِ وي جي رجسٽرڊ ڪيسن جو انگ 84 هزار تائين پهچي ويو آهي، جن مان 61 هزار مريض علاج هيٺ آهن، جڏهن ته 16 هزار کان وڌيڪ مريض علاج دوران غائب ٿي ويا. آفيسرن چيو ته ڪيسن ۾ واڌ جو بنيادي سبب اسڪريننگ ۾ اضافو آهي. ڪميٽي جي اجلاس ۾ اهو به ٻڌايو ويو ته 2020 ۾ 49 سينٽرن تي لڳ ڀڳ 38 هزار ماڻهن جي اسڪريننگ ڪئي وئي، 2025 تائين ٽيسٽنگ سينٽرن جو انگ 97 ڪيو ويو جتي 3 لک کان وڌيڪ ماڻهن جا ٽيسٽ ڪيا ويا ۽ 14 هزار کان وڌيڪ ڪيس مثبت آيا. ڪميٽي ميمبرن سرنج جي ٻيهر استعمال کي ايڇ آءِ وي پکڙجڻ جو بنيادي سبب قرار ڏنو. صحت واري وفاقي وزير مصطفيٰ ڪمال چيو آهي ته وزيراعظم سان ايڇ آءِ وي بابت ملاقات ٿي جنهن ۾ 10 سي سي سرنج سميت ڪنهن به سرنج جي ٻيهر استعمال تي پابندي ۽ ڪنهن به آپريشن کان اڳ ايڊز جي اسڪريننگ کي لازمي بڻائڻ جو فيصلو ڪيو ويو. هن چيو ته ايڇ آءِ وي جي روڪٿام لاءِ گلوبل فنڊ طرفان پاڪستان کي 65 ملين ڊالر ڏنا پيا وڃن، جنهن مان صرف 3.9 ملين ڊالر صحت واري وزارت کي ڏنا ويا آهن، جڏهن ته 61 ملين ڊالر ٻن غير سرڪاري ادارن کي ڏنا پيا وڃن. ڪميٽي ميمبرن ڪميٽي کي سفارش ڪئي ته ايندڙ اجلاس ۾ سمورن لاڳاپيل ادارن طرفان بريفنگ ڏني وڃي.



Source link