فيڊرل بورڊ آف روينيو جي چيئرمين راشد محمود لنگريال ڪوهاٽ ويجهو ڪسٽم انفورسمينٽ ٽيم تي حملي کي افسوسناڪ سانحو قرار ڏنو آهي.
ايڪسپريس نيوز موجب فيڊرل بورڊ آف روينيو (ايف بي آر) جي چيئرمين راشد محمود لنگريال چيو آهي ته ڪوهاٽ ويجهو پاڪستان ڪسٽمز جي انفورسمينٽ ٽيم تي بزدلاڻو حملو نه رڳو افسوسناڪ سانحو آهي پر پاڪستان جي سيڪيورٽي اهلڪارن تي به سڌو حملو آهي، مان ان واقعي جي سخت لفظن ۾ مذمت ڪريان ٿو.
هن چيو ته پاڪستان ڪسٽمز جي ڪانسٽيبل جواد احمد ۽ ايڪسائيز کاتي جي اي ايس آءِ ساجد الاسلام جي شهادت ايف بي آر، پاڪستان ڪسٽمز ۽ قانون لاڳو ڪندڙ ادارن لاءِ وڏو نقصان آهي.
ايف بي آر پاران جاري ڪيل بيان موجب پاڪستان ڪسٽمز کي انتهائي افسوس سان ٻڌائڻو پيو ته پاڪستان ڪسٽم جي هڪ انفورسمينٽ ٽيم تي معمول جي اينٽي اسمگلنگ ڊيوٽي سرانجام ڏئي رهي هئي، ڪوهاٽ ٽول پلازه جي ويجهو رات 12 لڳي 15 منٽن تي نامعلوم دهشتگردن حملو ڪيو.
حملي دوران پاڪستان ڪسٽمز ڪانسٽيبل جواد احمد ۽ ايڪسائيز کاتي جو اسسٽنٽ سب انسپيڪٽر (اي ايس آءِ) ساجد الاسلام ملڪ جي خدمت ڪندي بهادري سان وڙهندي شهيد ٿي ويا.
واقعي ۾ پاڪستان ڪسٽم جو هڪ ٻيو اهلڪار ڪانسٽيبل بصيرالله زخمي ٿي پيو، جنهن کي فوري طبي امداد ڏني پئي وڃي، جڏهن ته دهشتگردن فرار ٿيڻ کان اڳ سرڪاري انفورسمينٽ جي گاڏي کي به باهه ڏئي ڇڏي.
قانون لاڳو ڪندڙ ادارن هن بزدلاڻي حملي ۾ ملوث عنصرن جي نشاندهي، سراغ ۽ گرفتاري لاءِ جامع ڳولا ۽ جاچ شروع ڪري ڇڏي آهي.
ان افسوسناڪ واقعي جي سخت لفظن ۾ مذمت ڪندي فيڊرل بورڊ آف روينيو (ايف بي آر) جي چيئرمين راشد محمود لنگريال چيو آهي ته ڪوهاٽ ويجهو پاڪستان ڪسٽمز جي انفورسمينٽ ٽيم تي بزدلاڻو حملو نه رڳو افسوسناڪ سانحو آهي پر پاڪستان جي سيڪيورٽي اهلڪارن تي سڌو سنئون حملو آهي.
هن چيو ته مان ان واقعي جي سخت لفظن ۾ مذمت ڪريان ٿو. پاڪستان ڪسٽمز جي ڪانسٽيبل جواد احمد ۽ ايڪسائيز کاتي جي اي ايس آءِ ساجد الاسلام جي شهادت ايف بي آر، پاڪستان ڪسٽم ۽ قانون لاڳو ڪندڙ ادارن لاءِ وڏو نقصان آهي.
چيئرمين ايف بي آر چيو ته شهيد اهلڪارن جي بهادري، فرض شناسي ۽ عظيم قربانيون عوامي خدمت جي اعليٰ روايتن جي عڪاسي ڪن ٿيون. ايف بي آر سوڳوار خاندانن سان دلي تعزيت جو اظهار ڪندي انهن جي هر ممڪن مدد ڪرڻ جي هدايت ڪئي آهي.
هن چيو ته حملي ۾ زخمي ٿيل ڪسٽم ڪانسٽيبل بصيرالله جي جلد صحتيابي لاءِ دعاگو آهيون ۽ کيس بهترين طبي سهولتون فراهم ڪرڻ جي هدايت ڪئي وئي آهي، ايف بي آر پاڪستان ڪسٽمز جي هر آفيسر ۽ اهلڪار سان مڪمل يڪجهتي جو اظهار ڪري ٿو، جيڪي ملڪ ۾ ڏکين ۽ خطرناڪ حالتن ۾ خدمتون سرانجام ڏئي رهيا آهن. هي حملو سمگلنگ، منظم ڏوهن ۽ پاڪستان جي اقتصادي سلامتي کي درپيش ٻين خطرن خلاف اسان جي عزم کي ڪمزور ڪري نه ٿو سگهي ۽ نه ئي اسان جي آپريشن ۾ رڪاوٽ بڻجي سگهي ٿو.
راشد لنگريال چيو ته اسان پنهنجي فيلڊ فارميشنز جي سڪيورٽي، فلاحي ۽ آپريشنل سپورٽ کي مضبوط ڪندا رهنداسين. اسان جي شهيدن جون قربانيون پاڪستان ڪسٽم جي تاريخ ۾ هميشه زندهه رهنديون. جنهن جي همت، عزم ۽ فرض شناس عوامي خدمت جي اعليٰ روايتن جي عڪاسي ڪن ٿا.
هن چيو ته اسمگلنگ خلاف جنگ ۽ پاڪستان جي معاشي سرحدن جي حفاظت دوران سندس شهادت قومي مفادن جي تحفظ لاءِ سندس غير متزلزل عزم جو مظهر آهي.
شهيد اي ايس آءِ ساجد الاسلام جي جنازي نماز ۽ تدفين جو انتظام ايڪسائيز کاتي طرفان ڪيو ويندو. پاڪستان ڪسٽمز ٻنهي شهيدن جي خاندانن سان دلي تعزيت جو اظهار ڪندي ڪانسٽيبل بصيرالله جي جلد صحتيابي لاءِ دعا ڪئي آهي.
