وفاقي گهرو وزير محسن نقوي منصوره ۾ جماعت اسلامي جي امير حافظ نعيم الرحمان سان ملاقات ڪئي.
ايڪسپريس نيوز موجب ان اهم ملاقات ۾ ملڪ جي مجموعي سياسي، معاشي ۽ امن امان جي صورتحال تي تفصيلي خيالن جي ڏي وٺ ڪئي وئي، جڏهن ته ايران آمريڪا مفاهمت کانپوءِ خطي جي موجوده صورتحال تي به خيالن جي ڏي وٺ ڪئي وئي.
ٻنهي اڳواڻن ايران ۽ آمريڪا جي مفاهمت کي خطي جي استحڪام ۽ امن لاءِ خوش آئند پيش رفت قرار ڏنو. امير جماعت اسلامي حافظ نعيم الرحمان ايران آمريڪا مفاهمت ۾ پاڪستان جي مخلص ڪردار کي ساراهيو.
گهرو وزير محسن نقوي امير جماعت اسلامي کي ايران آمريڪا ڳالهين ۽ ان حوالي سان حڪومتي قدمن تي اعتماد ۾ ورتو. اجلاس ۾ حافظ نعيم الرحمان حڪومت کان مطالبو ڪيو ته هو صوماليا ۾ ڦاٿل پاڪستانين جي فوري ۽ محفوظ بازيابي لاءِ موثر سفارتي ڪردار ادا ڪري.
ملاقات ۾ ملڪي معيشت کي بهتر بڻائڻ ۽ عوام کي رليف فراهم ڪرڻ تي به تفصيلي خيالن جي ڏي وٺ ڪئي وئي.
حافظ نعيم الرحمان چيو ته ايران آمريڪا مفاهمت ۾ پاڪستان جو تاريخي ڪردار هميشه ياد رکيو ويندو. ان عمل سڄي خطي ۾ پائيدار امن لاءِ راهه هموار ڪئي آهي.
ان موقعي تي محسن نقوي چيو ته وزيراعظم ۽ فيلڊ مارشل امن لاءِ ناقابل فراموش ڪردار ادا ڪيو. خطي ۾ ڇڪتاڻ ختم ڪرڻ جو ڪريڊٽ پاڪستان کي وڃي ٿو. الله تعاليٰ جو شڪر آهي جو هن اسان جي محنت کي قبول ڪيو.
