تهران:
ايراني هٿياربند فوج جي خاتم الانبياء سينٽرل هيڊ ڪوارٽر خبردار ڪيو آهي ته جيڪڏهن اسرائيل ڏکڻ لبنان ۾ پنهنجون فوجي ڪارروايون جاري رکيون ته ان کي سخت ردعمل کي منهن ڏيڻو پئجي سگهي ٿو.
ايراني فوج جي ترجمان پاران جاري ڪيل بيان ۾ چيو ويو آهي ته گذريل ٻن ڏينهن دوران اسرائيلي فورسز ڏکڻ لبنان ۾ 84 ڀيرا جنگبندي جي ڀڃڪڙي ڪئي آهي ۽ شهري شهيد ڪيا ويا آهن، جنهن سبب خطي ۾ ڇڪتاڻ ۾ اضافو ٿي رهيو آهي.
بيان ۾ وڌيڪ چيو ويو آهي ته آمريڪي صدر ڊونلڊ ٽرمپ جي جنگ بندي يا ڇڪتاڻ ۾ گهٽتائي جي دعوائن جي باوجود زميني صورتحال بهتر نه ٿي آهي ۽ اسرائيلي ڪارروايون جاري آهن.
خاتم الانبياء جي هيڊ ڪوارٽر واضح ڪيو ته جيڪڏهن اها صورتحال برقرار رهي ۽ اسرائيلي فوج ڏکڻ لبنان ۾ پنهنجون ڪارروايون بند نه ڪيون ته ايران جي هٿياربند فوج مناسب ۽ مضبوط جواب ڏيڻ جي صلاحيت رکي ٿي.
بيان ۾ ان عزم جو به اظهار ڪيو ويو ته خطي ۾ ڪنهن به جارحيت جو منهن ٽوڙ جواب ڏنو ويندو ۽ هڪ طرفي ڪارروائي کي برداشت نه ڪيو ويندو.
