پاڪستان هاڪي فيڊريشن ملڪ جي اڀرندڙ هاڪي ٽيلنٽ کي عالمي سطح تي بهترين موقعا ۽ سخت مقابلي جي فراهمي لاءِ ڪيترن ئي بين الاقوامي ترقياتي منصوبن جو اعلان ڪيو آهي. اهي شروعات نوجوان رانديگرن کي تيار ڪرڻ ۽ انهن کي مستقبل جي چئلينجن لاءِ تيار ڪرڻ جي عمل ۾ هڪ اهم ڪڙي آهن. پاڪستان انڊر 18 بوائز ٽيم کي عمان ۾ ٿيندڙ اليون اي سائڊ (فائيو اي سائڊ) هاڪي ٽورنامينٽ ۾ شرڪت جي اجازت ڏيڻ کانپوءِ هاڻي پي ايڇ ايف پاڪستان انڊر 18 وومين هاڪي ٽيم کي به انٽرنيشنل ليول تي موڪلڻ جو فيصلو ڪيو آهي. وومينز ٽيم نيشنل هاڪي چيمپيئن شپ کان فوري پوءِ انٽرنيشنل فائيو سائڊ ايونٽ ۾ پاڪستان جي نمائندگي ڪندي. ان کان علاوه پي ايڇ ايف پاڪستان جي انڊر 21 جونيئر هاڪي ٽيم کي به جولاءِ جي مهيني ۾ عمان موڪليندو جتي هو عالمي مقابلن ۽ نمائشي ميچن ۾ شرڪت ڪندي. ان اقدام جو مقصد جونيئر رانديگرن کي پاڪستان جي اعليٰ سطح تي نمائندگي ڪرڻ لاءِ تيار ڪرڻ آهي. پاڪستان هاڪي فيڊريشن موجب جون ۽ جولاءِ جا مهينا پاڪستان هاڪي لاءِ انتهائي مصروف ۽ پيداواري ثابت ٿي رهيا آهن. ان دوران سينيئر قومي ٽيم، جونيئر ٽيم ۽ انڊر 18 اسڪواڊ سڀ بين الاقوامي مقابلن ۾ حصو وٺي رهيا آهن، جنهن سان سندن مقابلي واري صلاحيت ۾ نمايان اضافو ٿيندو. پي ايڇ ايف جي ترجمان جو چوڻ آهي ته انهن انٽرنيشنل ٽورنامنٽس ۽ ميچن ۾ شرڪت سان اسان جي نوجوان رانديگرن کي مضبوط مخالفن خلاف پاڻ کي پرکڻ، جديد راند جي ٽيڪنڪ سکڻ، حڪمت عملين کي بهتر بڻائڻ ۽ پنهنجي فٽنيس کي عالمي معيارن مطابق ڈھالڻ جو بهترين موقعو ملندو. فيڊريشن ان عزم جو ورجاءُ ڪيو آهي ته هو رانديگرن جي ترقي کي تيز ڪرڻ ۽ عالمي هاڪي ۾ پاڪستان جي وڃايل پوزيشن کي بحال ڪرڻ لاءِ هر ممڪن قدم کڻندو.
Source link
Leave a Comment Leave a Comment
