سپريم ڪورٽ چيو آهي ته طلاق کانپوءِ عورت کي ڪيس ۾ ڦاسائڻ سندس عزت نفس ۽ آزادي تي سنگين حملو آهي، سپريم ڪورٽ عدالتي عمل جو غلط استعمال ڪرڻ تي اڳوڻي مڙس تي 5 لک رپيا ڏنڊ لاڳو ڪري ڇڏيو آهي.
سپريم ڪورٽ 9 صفحن تي ٻڌل فيصلو جاري ڪري ڇڏيو، عدالت فيصلي ۾ چيو ته اڳوڻو مڙس 30 ڏينهن اندر ڏنڊ جي رقم اڳوڻي زال کي ادا ڪرڻ جو پابند هوندو، ڏنڊ جي رقم ادا نه ڪرڻ جي صورت ۾ فيملي ڪورٽ کان جمع ڪرايو ويندو.
عدالت فيصلي ۾ لکيو ته اڳوڻي مڙس عورت تي بدتميزي جو الزام لڳايو جنهن جو مقصد عورت جي وقار کي نقصان پهچائڻ هو.
عدالت چيو ته طلاق کانپوءِ ٻي شادي ڪرڻ لاءِ عورت کي اڳوڻي مڙس کان اجازت وٺڻ جي ضرورت ناهي، ڪوڙا ڪيس ۽ ڪردار ڪشي جو مقصد رڳو دٻاءُ پيدا ڪرڻ آهي.
سپريم ڪورٽ چيو آهي ته عورتن خلاف ڪيس کي هراسان ڪرڻ يا توهين ڪرڻ لاءِ هٿيار طور استعمال نٿو ڪري سگهجي.
عدالت فيصلي ۾ لکيو ته سائلين جي عزت نفس جو تحفظ عدليه جي اولين ذميواري آهي. سپريم ڪورٽ پشاور هاءِ ڪورٽ جي فيصلي خلاف اڳوڻي مڙس جي اپيل رد ڪري ڇڏي.
واضح رهي ته 2014ع ۾ پشاور جي فيملي ڪورٽ ڏاج ڪڍڻ تي عورت جي حق ۾ خلع جو درجو جاري ڪيو هو.
